ამირან კვირიკაშვილის თვითმკვლელობამდე მიყვანის საქმეს შსს-ს ნაცვლად პროკურატურა გამოიძიებს. ოჯახის ინფორმაციით, კვირიკაშვილმა თავი შსს-ში დაკითხვის შემდეგ მოიკლა. ისინი პოლიციელების მხრიდან გარდაცვლილზე ფსიქოლოგიურ ზეწოლაზე საუბრობენ.

"ამჟამად საქმეზე ტარდება ყველა საჭირო საგამოძიებო მოქმედება, მიმდინარეობს გარდაცვლილი პირის ოჯახის წევრებისა და მოწმეების გამოკითხვა, ასევე გარდაცვალების მიზეზის დასადგენად დანიშნულია სასამართლო სამედიცინო ექსპერტიზა", - უთხრეს On.ge-ს პროკურატურაში.

2017 წლის 4 ნოემბერს, საქმეზე გამოძიება საქართველოს შინაგან საქმეთა სამინისტრომ დაიწყო. მოგვიანებით, პოლიციის შესაძლო ბრალეულობის გამო, საქმის შესწავლა გენერალური ინსპექციის გამომძიებლებმა დაიწყეს.