ებენიზერ სკრუჯის სახელი თქვენთვის უცხო არ უნდა იყოს. ინგლისური ლიტერატურის ეს ერთ-ერთი ყველაზე ცნობილი პერსონაჟი არაერთხელ გაცოცხლებულა ეკრანზეც. ამჯერად კი, სტუდია Paramount Pictures ჩარლზ დიკენსის საშობაო სიმღერის კიდევ ერთ კინოადაპტაციას შემოგვთავაზებს. ფილმში, სახელწოდებით Ebenezer, მთავარ პერსონაჟს ჯონი დეპი განასახიერებს, რომლისთვისაც ეს პირველი დიდი ჰოლივუდური როლია ყოფილ პარტნიორთან, ამბერ ჰერდთან, გახმაურებული სასამართლო დავის შემდეგ.

"კარგია დაბრუნება", — ამბობს ებენიზერად გარდასახული ჯონი დეპი ტრეილერში. ეს ფრაზა ორმაგ მნიშვნელობას ატარებს, თუ გავითვალისწინებთ, რომ ტრეილერში აქცენტი სწორედ ჯონი დეპის კინოინდუსტრიაში დაბრუნებაზეა გაკეთებული და მსახიობის შესრულებული ექსცენტრიკული პერსონაჟებია ჩამოთვლილი.

"მან გვაჩუქა ჯეკ ბეღურა, ედვარდ მაკრატელხელება, შეშლილი მექუდე. წლევანდელ მადლიერების დღესასწაულზე დამთხვეულების ოსტატი ბრუნდება", — ასეთი შესავლითაა წარმოდგენილი წუთნახევრიანი ვიდეო, რომელიც უკვე გვაგრძნობინებს დიკენსისეულ მისტიკურ ატმოსფეროს: თოვლიანი ინგლისი, ყვავები და მოჩვენებები. ფილმისადმი მაყურებლის მოლოდინი კი, როგორც ჩანს, იმდენად დიდია, რომ ტრეილერმა გამოსვლიდან რამდენიმე საათში 4,5 მილიონზე მეტი ნახვა მოაგროვა.

ჩარლზ დიკენსის მცირე მოთხრობა საშობაო სიმღერა 1843 წელს გამოიცა და ინგლისური ლიტერატურაში მისტიკური სადღესასწაულო ნაწარმოებების ტრადიციას დაუდო საფუძველი. ამბავი ძუნწ და ბუზღუნა მოხუც სკრუჯზე გვიყვება, რომელსაც წინასაშობაოდ მოჩვენებები მოსვენებას არ აძლევენ. გამოცემიდან ერთ კვირაში ბრიტანეთში საშობაო სიმღერის ყველა ეგზემპლარი გაიყიდა და მას შემდეგ ნაწარმოების ტირაჟის განახლება არ შეწყვეტილა. მოთხრობის მიხედვით შექმნეს არაერთი ფილმი, სპექტაკლი და ოპერაც კი, მაგრამ მისი გავლენა ხელოვნების სფეროს სცდება: მიიჩნევა, რომ დიკენსმა ნაწარმოებით თანამედროვე შობის არაერთი ატრიბუტი და წეს-ჩვეულებაც განსაზღვრა.

რაც შეეხება მის უახლეს ეკრანიზაციას ჯონი დეპით მთავარ როლში: ფილმის რეჟისორი ტი უესტია, სცენარი კი ნათანიელ ჰელპერნს ეკუთვნის. დეპთან ერთად, ებენიზერში ისეთ ვარსკვლავურ სახეებსაც ვიხილავთ, როგორებიც არიან იენ მაქკელენი, რუპერტ გრინტი და სემ კლეფლინი.

"დღესასწაული იწყება მონაჩმახით", — სკრუჯის ამ საფირმო სიტყვით სრულდება ტრეილერი.

ებენიზერის პრემიერა 13 ნოემბერს შედგება.