ჯიმ პარსონსი 12 წლის განმავლობაში დიდი აფეთქების თეორიის მთავარი სახე იყო, თუმცა სერიალზე მუშაობამ მის ფსიქოლოგიურ მდგომარეობაზე უარყოფითად იმოქმედა. მსახიობის თქმით, ამ პერიოდში ხშირად თავს "უბედურად" გრძნობდა.

ჯიმ პარსონსი CBS-ის პოპულარულ სიტკომში შელდონ კუპერის როლს 2007-დან 2019 წლამდე ასრულებდა. სერიალმა მსახიობს მსოფლიო პოპულარობა მოუტანა და, როგორც ამბობს, იმ პერიოდს მისი ცხოვრების რამდენიმე საუკეთესო მომენტიც უკავშირდება. მიუხედავად ამისა, წარსულს რომ იხსენებს, მსახიობი აცნობიერებს, რომ ბევრი თვალსაზრისით თავს უბედურად გრძნობდა.

"ბედნიერი არ ვიყავი, თავს მუდმივად დაძაბულად ვგრძნობდი. ისეთი განცდა მქონდა, რომ ერთდროულად ძალიან ბევრი რამ უნდა მეკონტროლებინა და ჩემს ცხოვრებაში არსებული წარმატება თუ ყველაფერი კარგი მხოლოდ ამ გადაჭარბებული შრომისა და დისციპლინის შედეგი უნდა ყოფილიყო", — თქვა მან ერთ-ერთ პოდკასტში.

ფოტო: CBS

ჯიმ პარსონსის თქმით, იმ პერიოდს "არცერთი თანხის სანაცვლოდ" აღარ დაუბრუნდებოდა, რადგან მისი შრომისმოყვარეობა საბოლოოდ თითქმის აკვიატებულ ქცევაში გადაიზარდა.

"დიახ, დისციპლინირებული ვიყავი და კარგი სამუშაო ეთიკაც მქონდა, მაგრამ ამის დიდი ნაწილი ერთგვარ აკვიატებას ჰგავდა. თავში სულ იმ საქმეების ჩამონათვალი მქონდა, რომლებიც აუცილებლად უნდა შემესრულებინა, რათა თავი მშვიდად მეგრძნო და დარწმუნებული ვყოფილიყავი, რომ ჩემს საქმეს კარგად გავაკეთებდი. ახლა აღარ მგონია, რომ ეს მართლაც აუცილებელი იყო", — დასძინა მსახიობმა.

ფოტო: CBS

Entertainment Weekly-ის ცნობით, სერიალი მას შემდეგ დასრულდა, რაც ჯიმ პარსონსმა მე-13 და მე-14 სეზონებში მონაწილეობისთვის შეთავაზებულ $50 მილიონზე უარი თქვა.

დიდი აფეთქების თეორია CBS-ის ერთ-ერთ ყველაზე წარმატებულ სერიალად იქცა, ხოლო მისი მთავარი მსახიობები, მათ შორის კეილი კუოკო, კუნალ ნაიარი და საიმონ ჰელბერგი, ტელევიზიის ყველაზე მაღალანაზღაურებად ვარსკვლავებს შორის მოხვდნენ.

23 ივლისს სერიალის მეორე სპინ-ოფის, Stuart Fails to Save the Universe-ის პრემიერა იგეგმება.