ქუთაისი-წყალტუბო-ცაგერი-ლენტეხი-ლასდილის საავტომობილო გზის ნაწილზე, უამინდობისა და სტიქიური მოვლენების გამო, ავტოტრანსპორტის მოძრაობა დროებით აკრძალულია. ინფორმაციას საავტომობილო გზების დეპარტამენტი ავრცელებს.

"შიდასახელმწიფოებრივი მნიშვნელობის ქუთაისი (წყალტუბოს გადასახვევი)-წყალტუბო-ცაგერი-ლენტეხი-ლასდილის საავტომობილო გზის 141-ე კმ-ზე (სოფელი ცანა) და 144-ე კმ-ზე (სოფელი ყორულდაში) ჩამოსულია მიწის მასა, რის გამოც აღნიშნული გზის კმ92-კმ151 (სოფელი ბაბილი-ლასდილი) მონაკვეთზე და შიდასახელმწიფოებრივი მნიშვნელობის ზუგდიდი-ჯვარი-მესტია-ლასდილის საავტომობილო გზის კმ185-კმ190 (უშგული-ლასდილი) მონაკვეთზე დროებით იკრძალება ყველა სახის ავტოტრანსპორტის მოძრაობა.

ამასთანავე, დღეს, ქუთაისი (წყალტუბოს გადასახვევი)-წყალტუბო-ცაგერი-ლენტეხი-ლასდილის საავტომობილო გზის 98-ე კმ-ზე (საყდრის ხიდი) მონაკვეთზე ადიდდა მდინარე, გადმოვიდა საავტომობილო გზაზე და უსაფრთხოების მიზნით მოძრაობა აიკრძალა", — აღნიშნულია დეპარტამენტის მიერ გავრცელებულ ინფორმაციაში.

შექმნილ ვითარებასთან დაკავშირებით კომენტარი გააკეთა საავტომობილო გზების დეპარტამენტის ხელმძღვანელის მოადგილემ, გიორგი ორმოცაძემ. მისი განცხადებით, ადგილზე მობილიზებულია შესაბამისი ტექნიკა და აქტიური სამუშაოები მიმდინარეობს.

"შიდასახელმწიფოებრივი მნიშვნელობის ქუთაისი-წყალტუბო-ცაგერი-ლენტეხი-ლასდილის საავტომობილო გზის 98-ე კილომეტრზე, გუშინ, 19 ივლისს, ადიდდა მდინარე და გადმოვიდა საავტომობილო გზაზე, რის გამოც აღნიშნულ მონაკვეთზე ამ დროისთვის აკრძალულია ავტოტრანსპორტის მოძრაობა.

წყლის დონის დაწევისთანავე დავიწყეთ გაწმენდითი სამუშაოები, რომელიც ახლაც მიმდინარეობს. ადგილზე სრულად არის მობილიზებული ყველა საჭირო მძიმე ტექნიკა, რომელიც სტიქიური მოვლენების სალიკვიდაციო სამუშაოებშია ჩართული და იმედს ვიტოვებთ, რომ უმოკლეს ვადებში შევძლებთ ავტოტრანსპორტის გადაადგილების სრულად აღდგენას", — აღნიშნა გიორგი ორმოცაძემ.