კომუნიკაციების კომისიამ (ComCom) ტელეკომპანია "ფორმულა" ტერმინების გამოყენებისთვის 5 000 ლარით დააჯარიმა. "მედიაჩეკერის" ინფორმაციით, კომისია ტელეკომპანიას ბოლო ოთხ თვეში მესამედ ედავება.

მედიამონიტორინგის დეპარტამენტმა ამჯერად "ფორმულას" 15-17 ივნისის საინფორმაციო გამოშვებები შეამოწმა და მიიჩნია, რომ ტელეკომპანიამ დაარღვია კანონის 54-ე მუხლის მე-5 პუნქტი, რომელიც სამართლიანობასა და მიუკერძოებლობას ეხება.

კომისიის დასკვნით, არხი ახალ ამბებში მოვლენებს საკუთარი მოსაზრებებისა და სუბიექტური დამოკიდებულების საფუძველზე აშუქებს. მოხსენებით ბარათში მაგალითებად მოყვანილია ისეთი ფრაზების სისტემატური გამოყენება, როგორიცაა — "ოცნების ხელისუფლება/პრეზიდენტი/პროკურატურა/პრემიერი", "რეპრესიული კანონები", "ოცნების რეჟიმის რეპრესიები".

კომისიამ "ფორმულა" 21 მაისსაც დააჯარიმა ამავე ბრალდებით. კომისიის აზრით, ტელეკომპანიის მიერ "ოცნების სუსი", "ივანიშვილის ხელისუფლება“, "პროსამთავრობო რუსთავი 2“, "რეჟიმის სასამართლო“ და სხვა მსგავსი ფრაზების გამოყენებით მაუწყებელმა ახალი ამბები პირადი დამოკიდებულების და მოსაზრების გავლენით გააშუქა. კომისიამ ამავე ბრალდებით 25 ივნისს "ტვ პირველი" დააჯარიმა.