მერილენდში კაცმა ბანკის გაძარცვა უჩვეულო "თანამზრახველთან" — მოპარულ კნუტთან ერთად სცადა.

კაცი თავდაპირველად ქალაქ ბელტსვილში მდებარე Pet Supplies Plus-ის ზოომაღაზიაში შევიდა, საიდანაც 3 თვის შავ-თეთრი კნუტი, სახელად მაგნოლია მოიპარა. თვითმხილველების თქმით, ამის შემდეგ ის იმავე სავაჭრო ცენტრში მდებარე PNC Bank-ის ფილიალისკენ გაიქცა.

"კაცი, რომელმაც კნუტი წაიყვანა, ახლომდებარე ბანკში შევიდა და მისი გამოყენება ძარცვის მცდელობისას სცადა. მან ბანკის მენეჯერს კნუტის დაჭერა სთხოვა, სანამ წერილს დაწერდა, შემდეგ კი მოლარეს გადასცა ჩანაწერი, რომელშიც ნაღდ ფულს ითხოვდა", — წერს ცხოველთა დამცველი ორგანიზაცია Beltsville Community Cats.

ფოტო: GoogleMaps

ძარცვის მცდელობა წარუმატებლად დასრულდა, ეჭვმიტანილი კი დააკავეს. მაგნოლია ბანკის მენეჯერის კაბინეტში იპოვეს — კნუტი უვნებელი იყო.

"მაშინვე დავინახე უამრავი პოლიციის მანქანა და გავიფიქრე, რომ მოპარული კატის გამო საკმაოდ მასშტაბური რეაგირება იყო. შემდეგ მივხვდი, რომ პოლიციელები ბანკისკენ მიდიოდნენ. რამდენიმე წუთის შემდეგ გვითხრეს, რომ კნუტი ბანკში იყო", — უამბო NBC 4-ს Beltsville Community Cats-ის წარმომადგენელმა სტეფანი სტულიჩმა.

ზოომაღაზიის ერთ-ერთი თანამშრომლის თქმით, კაცი რამდენიმე კვირის განმავლობაში მაღაზიას თითქმის ყოველდღე სტუმრობდა და კნუტით განსაკუთრებით იყო დაინტერესებული.

მაგნოლია.

ფოტო: Beltsville Community Cats

ამჟამად მაგნოლიასთვის ახალ სახლს ეძებენ.

"ახლა, როცა მისი ხანმოკლე "კრიმინალური ცხოვრება" წარსულს ჩაბარდა, მაგნოლია ისევ იმას აკეთებს, რაც ყველაზე კარგად გამოსდის — ადამიანების გულებს იპყრობს. ის მუდმივ სახლს კვლავ ეძებს, სადაც ერთადერთი, რასაც მოიპარავს, სასუსნავები და სათამაშოები იქნება", — დაწერა Beltsville Community Cats-მა ფეისბუქზე.