ესპანეთის სამხრეთ-აღმოსავლეთ ნაწილში, ალმერიის პროვინციის მუნიციპალიტეტ ლოს-გალიარდოსში გაჩენილ ტყის ხანძარს სულ მცირე 12 ადამიანი ემსხვერპლა, კიდევ 6 კი დაშავდა. ინფორმაციას BBC ავრცელებს.

ანდალუსიის რეგიონული მთავრობის განცხადებით, დაღუპულთა ნაწილი ცეცხლში გახვეულ ავტომობილებში იპოვეს. თვითმხილველების ინფორმაციით, ხანძარი შესაძლოა ელექტროგადამცემი ხაზის დაზიანებამ გამოიწვია, რის შემდეგაც ცეცხლი სწრაფად გავრცელდა ახლომდებარე ტყიან ტერიტორიაზე. თუმცა, ხანძრის გამომწვევი მიზეზი ოფიციალურად ჯერ დადასტურებული არ არის.

"ლოს-გალიარდოსში ხანძრის შედეგად დაღუპულთა რაოდენობა 12-მდე გაიზარდა, მას შემდეგ, რაც კიდევ ექვსი ადამიანის გარდაცვალება დადასტურდა", — ნათქვამია ანდალუსიის მთავრობის განცხადებაში.

რეგიონული მთავრობის ხელმძღვანელი, ხუანმა მორენო, ხუანმა ექვსი დაღუპულის შესახებ თავდაპირველი ინფორმაციის გამოცხადების შემდეგ, პლატფორმა X-ზე დაწერა:

"ჩვენი გულები დამძიმებულია და მწუხარებისგან განადგურებულები ვართ", — აღნიშნულია განცხადებაში.

ხანძრის ჩასაქრობად ბედარის დასახლებაში დაახლოებით 150 მეხანძრე მუშაობდა. დაშავებულებს შორის იყო ერთი ადამიანი, რომელიც კვამლის შესუნთქვით საავადმყოფოში გადაიყვანეს, ხოლო მეორემ დამწვრობა მიიღო. ოთხ ადამიანს ადგილზე დახმარება აღმოუჩინეს ძლიერი კვამლისგან გამოწვეული მცირე დამწვრობისა და სუნთქვის პრობლემების გამო.

სტიქიის გამო რამდენიმე გზა დაიკეტა, ხოლო საგანგებო სამსახურების ინფორმაციით, ევაკუირებულია დაახლოებით 1 000 ადგილობრივი მცხოვრები.

ესპანეთის პრემიერმინისტრმა პედრო სანჩესმა მაისში განაცხადა, რომ ქვეყანა მიმდინარე ზაფხულში ტყის ხანძრების წინააღმდეგ საბრძოლველად ისტორიაში ყველაზე მასშტაბურ რესურსს გამოიყენებდა. ხანძრის სალიკვიდაციო სამუშაოებში ასევე ჩაერთო ესპანეთის სამხედრო საგანგებო სიტუაციების დანაყოფი (UME).

სამხრეთ ევროპაში ბოლო დღეებია ძლიერი სიცხე გრძელდება. ესპანეთში, საფრანგეთსა და პორტუგალიაში ასობით მეხანძრე ერთდროულად რამდენიმე მასშტაბურ ხანძარს ებრძვის, ხოლო ათასობით ადამიანს საკუთარი საცხოვრებლის დატოვება მოუხდა.