თუ შენც იმ ადამიანების ჯგუფს მიეკუთვნები, ვისაც ზაფხულში, პაპანაქება სიცხეში, გარშემო ყველაფერი რომ იწვის და ჰაერიც თითქოს გაჩერებულია, ძილისას მაინც სჭირდება რამის მიფარება, ერთად ამოვხსნათ, რას უკავშირდება ეს უცნაური ქცევა.

ქცევა ერთი შეხედვით ალოგიკურიც კია, მაგრამ თითქმის ყველა ვაკეთებთ ამას — შეიძლება სრულად საბანში არ გავეხვიოთ, მაგრამ თხელ ზეწარს მაინც მივიფენთ ხოლმე, თუნდაც მხოლოდ მუცელზე ან ცალ ფეხზე.

პირველი მიზეზი წმინდა წყლის ბიოლოგიაა. ჩვენი სხეულის ტემპერატურა დღის განმავლობაში მუდმივად იცვლება. ჩაძინებამდე დაახლოებით ერთი საათით ადრე ორგანიზმი გაგრილებას იწყებს, რაც ტვინისთვის დაძინების სიგნალია.

ფოტო: Pinterest

ყველაზე საინტერესო კი ის არის, რომ ძილის ღრმა ფაზაში, როცა სიზმრებს ვნახულობთ, სხეული ტემპერატურის რეგულირების უნარს პრაქტიკულად კარგავს. ტვინმა ეს იცის — თუნდაც ოთახში 35 გრადუსი იყოს, ჩვენი ქვეცნობიერი თადარიგს იჭერს. ეშინია, რომ სხეული გაიყინება და ამიტომ ითხოვს დამცავ ფენას — სტაბილურობის გარანტიას.

მეორე და კიდევ უფრო ძლიერი ფაქტორი ფსიქოლოგიურია. როცა კანზე თუნდაც ძალიან მსუბუქი ზეწრის შეხებას ვგრძნობთ, ჩვენი ტვინი მას, როგორც ფიზიკულ ჩახუტებას, ისე აღიქვამს. ეს მექანიზმი მომენტალურად ააქტიურებს პარასიმპათიკურ ნერვულ სისტემას, რის შედეგადაც ორგანიზმში სტრესის ჰორმონის, კორტიზოლის დონე მცირდება, ბედნიერებისა და ძილის ჰორმონების, სეროტონინისა და მელატონინის გამოყოფა კი პირიქით — აქტიურდება. ფაქტობრივად, საბანი სხეულს სიგნალს აძლევს, რომ უსაფრთხო გარემოშია და სრულიად მოდუნება შეუძლია.

ისე, თითქოს ბუნებრივიცაა ეს კავშირი, ბავშვობაში გვაქვს გამომუშავებული — აკვნიდან მოყოლებული, საბნის გადაფარება ყოველთვის მზრუნველობასთან და დაცულობასთან ასოცირდებოდა.

ფოტო: Pinterest

ჰოდა, რადგან ტვინს საბანი უსაფრთხოებისთვის სჭირდება, სხეულს კი სიცხისგან თავის დაღწევა უნდა, ჩვენი ინსტინქტები გენიალურ კომპრომისს პოულობს და მაგიტომაა, ერთ ფეხს საბნიდან გარეთ რომ ვყოფთ ხოლმე.

ჩვენს ხელისგულებსა და ფეხის ტერფებზე სპეციალური სისხლძარღვოვანი ქსელებია, რომლებიც სითბოს გაცემაზე აგებს პასუხს. ტერფის გარეთ დატოვებით სხეული ზედმეტ სიცხეს გასცემს, სხეულის ნაწილი კი საბნის ქვეშ რჩება და ჩახუტების შეგრძნებას ინარჩუნებს.

ასე რომ, თუ ზაფხულის ღამეს საბნის გარეშე ვერ იძინებ, არ გეგონოს, რომ უცნაური ჩვევა გაქვს.