თუ დილით ისეთი შეგრძნებით იღვიძებ, თითქოს ძილის ნაცვლად მთელი ღამე აგურებს ეზიდებოდი, მარტო არ ხარ. ქრონიკული უძილობა კოშმარად გვექცა და უნდა ვაღიაროთ, რომ ხშირად ჩვენვე ვუწყობთ მას საკუთარ თავს.

ძილის წინ მედიტაციაზე, ხალხურ მეთოდებზე, გვირილის ჩაის ბებიის დატოვებულ რეცეპტზე და სურნელოვან სანთლებზე ამ ბლოგში არ დაგელაპარაკები. როცა გონება დაღლილობისგანაა გადამწვარი და მოდუნებას ფიზიკურად ვერ ახერხებ, უფრო მარტივი და პრაქტიკული რჩევებია საჭირო.

აი, რამდენიმე მათგანი:

1. გაიღვიძე ერთსა და იმავე დროს (შაბათ-კვირის ჩათვლით)

ჩვენი ორგანიზმის შიდა საათს ყველაფერზე მეტად პროგნოზირებადობა უყვარს. როცა სამუშაო დღეებში დილის 8 საათზე დგები, უქმეებზე კი ლოგინში შუადღემდე კოტრიალობ, ორგანიზმი იბნევა. ამიტომ, მაშინაც კი, თუ ღამე გვიან დაიძინე, მაინც ჩვეულ დროს უნდა ადგე. შეიძლება იმ კონკრეტულ დღეს ცოტა გათიშულმაც იარო, სამაგიეროდ, საღამოს წვალების გარეშე ჩაგეძინება.

2. თუ ვერ იძინებ, არ დააძალო თავს!

დაწოლისას, თვალს თუ ვერ ხუჭავ და გონებას ვერ თიშავ, მისი წვალება, ლოგინში წრიალი და ჭერში ყურება ყველაზე დიდი შეცდომაა. ამ დროს თავს ისტრესავ, სტრესი და ნერვიულობა კიდევ უფრო მეტად გიშლის ხელს ჩაძინებაში.

თუ გრძნობ, რომ 20-წუთიანი მცდელობის შემდეგ მაინც ვერაფერი ქენი, უბრალოდ ადექი, გადი სხვა ოთახში და წაიკითხე რამე, წყალი დალიე, ფანჯარა გამოაღე და ჰაერი ღრმად ჩაისუნთქე. საძინებელში მხოლოდ მაშინ დაბრუნდი, როცა ყურადღების გადატანის შემდეგ თვალები თავისით დაგეხუჭება.

3. მოერიდე კოფეინს დღის მეორე ნახევარში

ყავის ნახევრად დაშლის პერიოდი ორგანიზმში დაახლოებით 6 საათია. ეს ნიშნავს, რომ თუ დღის 4 საათზე დალიე ბოლო ფინჯანი, ღამის 10 საათზე მისი ნახევარი ჯერ ისევ სისხლში გექნება და ნერვულ სისტემას გამოაფხიზლებს. მაშინაც კი, თუ გგონია, რომ ყავა შენზე არ მოქმედებს. ძილის ხარისხის შესანარჩუნებლად დღის 2 საათის შემდეგ ყავას და ენერგეტიკულ სასმელებს უბრალოდ აღარ უნდა გაეკარო.

4. მოერიდე ეკრანის შუქს

როცა დაძინებამდე სოციალურ ქსელებს სქროლავ, ტვინი სიგნალს იღებს, რომ ჯერ ისევ დღეა და მელატონინის გამოყოფას ბლოკავს. ამას ისიც ემატება, რომ ინფორმაცია, რომელსაც იღებს, დოფამინის გამოყოფასაც უწყობს ხელს, რაც ორგანიზმს საბრძოლო მზადყოფნაში აბრუნებს.

გამოსავალი მარტივია — დაძინებამდე მინიმუმ ერთი საათით ადრე ტელეფონი საწოლისგან მოშორებით დაიდე.

5. საძინებელი მხოლოდ ძილის ადგილი გახადე

თუ საწოლში მუშაობ, ფილმებს უყურებ, წერ, ჭამ და ტელეფონსაც საათობით ათვალიერებ, ტვინისთვის საწოლი უბრალოდ სამუშაო სივრცე ხდება და აღარანაირი კავშირი დასვენებასთან აღარ აქვს.

როცა საწოლს მხოლოდ ძილთან აკავშირებ, ორგანიზმიც უფრო სწრაფად სწავლობს, რომ დაწოლისას მოდუნება შეუძლია.

6. საღამოს მძიმე ვახშამს მოერიდე

დიეტის კულტურამ რომ დაგვაჯერა, 6-ის მერე ჭამა მავნეაო, იმედია, მაგის აღარ გჯერა?!

ყველაფერი, რა თქმა უნდა, ზომიერებაზეა დამოკიდებული და იმაზე, შენ როდის იძინებ. ერთი რამ უნდა გახსოვდეს: ძალიან ცხიმიან ან დიდი ულუფით მიღებულ საკვებს ორგანიზმი ღამითაც აქტიურად ამუშავებს. ამის გამო ზოგჯერ დაძინებაც ჭირს და ძილიც უფრო ზედაპირული ხდება.

თუ გვიან მაინც გშია, უმჯობესია მსუბუქი საკვები აირჩიო.

ამ ჩვევებიდან თუნდაც სამის დანერგვა საკმარისია, რომ რამდენიმე დღეში დილა სულ სხვა ენერგიით დაიწყო.