ახლახან Netflix-მა იმ ლეკვის პირველი კადრები გაავრცელა, რომელიც ახალ სერიალში — Scooby-Doo: Origins — დანაშაულების მაძიებელ მთავარ ოთხფეხა გმირს განასახიერებს.

ადრე სკუბის პერსონაჟი ყოველთვის ანიმაციური ან კომპიუტერული გრაფიკით შექმნილი იყო. ახლა კი ის სამსახიობო გუნდის სრულუფლებიანი წევრია და გადაღებებსაც შეუერთდება. Scooby-Doo: Origins-ში ახალ მსახიობებსაც ვხვდებით, მათ შორის მაკენა გრეისის (დაფნი ბლეიკი), ტანერ ჰაგენს (შეგი როჯერსი), ები რაიდერ ფორტსონს (ველმა დინკლი), მაქსველ ჯენკინსსა (ფრედ ჯონსი) და პოლ ვოლტერ ჰაუზერს.

Netflix-მა ახალი სერიალის პირველი კადრები როგორც ფოტოს, ისე სერიალის მოკლე ვიდეორგოლის სახით წარადგინა.

სიუჟეტის მიხედვით, ზაფხულის ბანაკში გატარებული ბოლო არდადეგების დროს ძველი მეგობრები — შეგი და დაფნი — იდუმალებით მოცული საქმის შუაგულში აღმოჩნდებიან. სცენარი დაკარგული გრანდ დანუას ჯიშის გერმანული დოგის ირგვლივ ვითარდება, რომელიც, სავარაუდოდ, ზებუნებრივი მკვლელობის მოწმეა.

"როგორც იქნა, სკუბი ნამდვილია!", — დაწერა ინსტაგრამზე შეგის როლის შემსრულებელმა, 21 წლის ტანერ ჰაგენმა.

კლასიკური მულტფილმის, Scooby-Doo, Where Are You!-ის პრემიერა CBS-ზე ჯერ კიდევ 1969 წელს შედგა. მას შემდეგ, მეგობრების გუნდი დიდ ეკრანებზეც არაერთხელ გამოჩნდა (მაგალითად, 2002 წლის ფილმში სკუბი-დუ) და სატელევიზიო ფილმებშიც (2009 წლის Scooby-Doo! The Mystery Begins). მიუხედავად იმისა, რომ ამ პროექტებში რეალური მსახიობები თამაშობდნენ, თავად სკუბი ყოველთვის ანიმაციურ პერსონაჟად რჩებოდა.

Scooby-Doo: Origins 2027 წელს გამოვა.