მაკაელა მიუზი ტეხასის ტექნოლოგიური უნივერსიტეტის გამოსაშვებ ცერემონიაზე თავის ძაღლთან, სეიდისთან, ერთად გამოჩნდა. უნივერსიტეტის მიერ ინსტაგრამზე გავრცელებულ ვიდეოში ჩანს, თუ როგორ ადიან სცენაზე მიუზი და მისი დამხმარე ძაღლი დიპლომის ასაღებად. მაკაელამ და მისმა ერთგულმა მეგობარმა ერთმანეთს სამოსიც კი შეუხამეს — ცერემონიაზე ორივეს ერთნაირი სტუდენტური მანტია ეცვა.

მაკაელამ ცხოველთა შემსწავლელი მეცნიერების ბაკალავრიატი დაამთავრა. მისი თქმით, უნივერსიტეტის დასრულების ცერემონიაზე დასწრებას სეიდიც იმსახურებდა, რადგან ძაღლი თითქმის ყველა ლექციას, ლაბორატორიულ კვლევასა თუ მეცადინეობას ესწრებოდა.

ვიდეო სოციალურ ქსელებში ვირუსულად გავრცელდა და უკვე 10 მილიონზე მეტი ნახვა დააგროვა:

ლექტორებმა მაკაელას მოულოდნელი სიურპრიზი მოუწყვეს და მის ძაღლს, სეიდის, ბაფთით შეკრული სათამაშო "დიპლომი-ძვალიც" კი გადასცეს.

People-სთან ინტერვიუში კურსდამთავრებულმა განმარტა, რომ ძაღლი თავიდან უბრალოდ შინაური ცხოველი უნდა ყოფილიყო. თუმცა, კოლეჯში სწავლისას, მაკაელამ ლექციაზე გონება დაკარგა, რის შემდეგაც ორი იშვიათი დაავადების დიაგნოზი დაუსვეს. ამან ძაღლის როლი მაკაელას ცხოვრებაში სრულიად შეცვალა.

"მარტივად რომ ვთქვათ, ამ ორი დაავადების გამო, ჩემი ჰორმონები მუდმივად თამაშობს, ძაღლის მთავარი საქმეც სწორედ ისაა, რომ ჰორმონების კონტროლში დამეხმაროს", — თქვა მაკაელამ, — "მას ჩემი კარგი, ცუდი და საშინელი დღეებიც კი უნახავს", — დასძინა მან.

ახლა, როდესაც მიუზი ვეტერინარულ ფაკულტეტზე სწავლის გასაგრძელებლად ემზადება, ირწმუნება, რომ სეიდი ყოველ ნაბიჯზე მის გვერდით იქნება.