როგორც წესი, სახლში დაბრუნებისთანავე პირველი, რასაც ვაკეთებთ ხოლმე, ფეხსაცმლის გახდაა. მთელი დღის მძიმე ძირიან ფეხსაცმელში, კედში ან თუნდაც სპორტულ ბოტასში გატარება იმდენად დამღლელია, რომ ხშირად იატაკზე შიშველი ფეხის დადგმასაც კი შვება მოაქვს ჩვენთვის.

და ეს მხოლოდ უბრალო შეგრძნება სულაც არ არის.

დღის განმავლობაში ჩვენი ტერფები მუდმივად დატვირთულია — სხეულის წონას უძლებს, მოძრაობისას ბალანსს იცავს და თან ხშირად, მოუხერხებელი და არასწორად შერჩეული ფეხსაცმლის გამო, არაბუნებრივ ფორმასაც იღებს. ზოგიერთი ფეხსაცმელი, მყარი ძირი რომ აქვს, თავად ასრულებს ამორტიზაციის ფუნქციას. ამის გამო, ტერფის ღრმა კუნთები ნაკლებად მუშაობს და დროთა განმავლობაში სუსტდება. სახლში ფეხშიშველი სიარული ტერფს საშუალებას აძლევს, ოდნავ მაინც დაუბრუნდეს ბუნებრივ მდგომარეობას და ეს შედარებით მიძინებული კუნთები ხელახლა აამუშაოს.

ფოტო: Joanna Bruszewska/Pinterest

თუ დაჰკვირვებიხარ, სახლში ფეხშიშველი სიარულისას, ტემპიც გვინელდება — ვეღარ “დავრბივართ” ისე, როგორც ქუჩაში — მშვიდად ვმოძრაობთ და ფრთხილ ნაბიჯებს ვდგამთ. ეს კი სრულიად ბუნებრივი რეაქციაა — ტერფის ძირზე ათასობით ნერვული დაბოლოებაა. როცა ზედაპირს ფეხშიშველი ვეხებით, სხეულის მდგომარეობისა და ბალანსის შესახებ ტვინი გაცილებით მეტ სიგნალს იღებს და ხვდება, რომ ახლა უკვე უსაფრთხო, დაცულ სივრცეშია.

იმის გამო, რომ თითქმის ყველა ფეხსაცმელს ქუსლთან მცირედი ამაღლება მაინც აქვს, მენჯის მდებარეობა ოდნავ იცვლება. შესაბამისად, იზრდება ხერხემალზე დატვირთვაც. ამიტომაა, რბილ ხალიჩაზე ან თუნდაც გრილ იატაკზე სიარულისას, სხეული ნაკლებად რომ იჭიმება და ზოგჯერ შვებას მუხლებშიც ვგრძნობთ და წელშიც.

ფოტო: Pinterest

თუმცა, თუ ტერფის ან ხერხემლის კონკრეტული პრობლემა გაქვს — მაგალითად, გამოხატული ბრტყელტერფიანობა — ძალიან მყარ ზედაპირზე ფეხშიშველი სიარული, შესაძლოა, არასასურველიც იყოს. ასეთ დროს ტერფის თაღი დამატებით იტვირთება და უკეთესი არჩევანი რბილი ხალიჩა ან ბუნებრივი ზედაპირებია — ბალახი, ქვიშა, მიწა — რეკომენდაციას მკურნალი ექიმი მოგცემს.

როცა გვინდა, დაღლილ ფეხებს და სხეულს დღის ბოლოს შვება მოვგვაროთ, ამისთვის სახლში რამდენიმე წუთით ფეხშიშველი გავლა ნამდვილად განსაკუთრებული და თან მარტივი საშუალებაა.