უკრაინის პრეზიდენტ ვოლოდიმირ ზელენსკის განცხდებით, მან უკრაინის ახალი სანქციების პაკეტს მოაწერა ხელი, რომელიც ომში რუსეთის მხარეს მყოფ ბელარუსთან დაკავშირებული სუბიექტების დასანქცირებას გულისხმობს.

სანქცირებულთა შორის არიან კომპანიები, რომლებიც რუსული ძალებისთვის 122 მმ-იან და 152 მმ-იან საარტილერიო ჭურვებს აწარმოებენ, მათ შორის Olsa, Minsk Thermoplast Plant და Heavy Forging Plant, რომლებიც ამუნიციის კომპონენტებს ამზადებენ.

სანქცირებულ პირთა სიაში შედის ვიქტორ შეიმანი — ლუკაშენკოს მრავალწლიანი თანამოაზრე, რომელსაც მაღალი სახელმწიფო თანამდებობები ეკავა და რომელსაც ჩრდილოვანი ბიზნესოპერაციების ხელშეწყობასა და სანქციების გვერდის ავლას ედავებიან.

დადგენილება ასევე ეხება ლუკაშენკოს ვაჟებს — ვიქტორსა და დმიტრის, რომლებსაც უკრაინული ხელისუფლება საერთაშორისო სანქციების გვერდის ავლით საქონლის ექსპორტის ხელშეწყობაში ადანაშაულებს, მათ შორის — ორმაგი დანიშნულების პროდუქციის მიწოდებასა და რეექსპორტში ბელარუსის გავლით.

ზელენსკის განცხადებით, სანქციები უკრაინის ეროვნული უსაფრთხოებისა და თავდაცვის საბჭომ დაამტკიცა.

"მე ხელი მოვაწერე კიდევ ერთ მნიშვნელოვან უკრაინულ სანქციების პაკეტს, რომელიც, განსაკუთრებით, ბელარუსში არსებულ სუბიექტებს ეხება.

ეს არის სიგნალი მრავალი ჩვენი პარტნიორისთვის, თუ სად უნდა განხორციელდეს ზეწოლა, რათა შემცირდეს ამ ომის მასშტაბი და ინტენსივობა," — განაცხადა ზელენსკიმ.

ზელენსკის განმარტებით, უკრაინის მიზანია კონფლიქტში ბელარუსის კიდევ უფრო მეტად ჩათრევა არ დაუშვას და სამხედრო მოქმედებების უკრაინის საზღვრებს გარეთ არ გაფართოვდეს.

"ბელარუსი არ უნდა ჩაირიოს ამ ომში. არ უნდა განხორციელდეს ოპერაციები სხვა ევროპული ქვეყნების წინააღმდეგ. და რუსეთის ომი უკრაინის წინააღმდეგ უნდა დასრულდეს ღირსეული მშვიდობით," — განაცხადა ზელენსკიმ.

ზელენსკიმ ასევე დაამატა, რომ უკრაინა საერთაშორისო პარტნიორებს მიაწვდის სადაზვერვო ინფორმაციას, რომელიც მიუთითებს, რომ მოსკოვი აგრძელებს უკრაინის ფარგლებს გარეთ ოპერაციების დაგეგმვას, მათ შორის — ბელარუსის უფრო ღრმად ჩართვის მცდელობებს რუსეთის მიზნების მიღწევაში.