შუა აღმოსავლეთში მიმდინარე კონფლიქტი ბევრ რამეზე ახდენს ნეგატიურ ზეგავლენას და, როგორც აღმოჩნდა, ერთ-ერთი პრეზერვატივების ფასებია. მსოფლიოში კონდომების უმსხვილესი მწარმოებელი, Karex, თავისი პროდუქციის 30%-ით ან კიდევ უფრო მეტით გაძვირებას აანონსებს, თუკი ირანის ომი გაგრძელდება. კომპანიის დირექტორი, გო მია კიატი, აცხადებს, რომ კონფლიქტის დაწყების შემდეგ ნედლეულზე ფასებმა თვალშისაცემად მოიმატა, რამაც წარმოების ხარჯებიც გაზარდა.

მას შემდეგ, რაც ირანმა აშშ-ისა და ისრაელისგან თავდასხმას ჰორმუზის სრუტეში გემების მიზანში ამოღების მუქარით უპასუხა, მსოფლიოში ნავთობის მიწოდება შეფერხდა. სრუტე, რომლის გავლითაც ნედლი ნავთობისა და თხევადი ბუნებრივი აირის გლობალური მარაგის მეხუთედის ტრანსპორტირება ხდება, ამჟამად დახურულია.

Karex-ს კი სწორედ ნავთობი სჭირდება სხვადასხვა პროდუქტის — მათ შორის, ლატექსისა და სილიკონზე დამზადებული ლუბრიკანტების — საწარმოებლად. მალაიზიური კომპანია ყოველწლიურად ხუთ მილიარდამდე პრეზერვატივს უშვებს და ისეთ გლობალურ ბრენდებს ამარაგებს, როგორიც Durex-ია.

გო მია კიატის თქმით, ახლა მსოფლიოში კონდომების განსაკუთრებული საჭიროებაა. გაძვირებული ტრანსპორტირებისა და შეფერხებული მიწოდების მიუხედავად, მხოლოდ წელს პრეზერვატივებზე მოთხოვნა 30%-ით გაიზარდა.

"რთულ პერიოდებში პრეზერვატივის გამოყენების უფრო მეტი საჭიროება არსებობს ხოლმე, რადგან მომავალი გაურკვეველია", — აცხადებს კომპანიის ხელმძღვანელი, — "არ იცი, თუნდაც მომავალ წელს ისევ გექნება თუ არა სამსახური. შვილის შეძენა კი ნიშნავს, რომ კიდევ ერთი ადამიანი გეყოლება სარჩენი".