Prime Video-მ სპაიდერ-ნუარის (Spider-Noir) ოფიციალური თრეილერი გამოაქვეყნა, სადაც ნიკოლას ქეიჯის დეტექტივი ბრენდან გლისონის სუპერბოროტმოქმედს უპირისპირდება. სერიალი, რომელიც Spider-Man Noir-ის კომიქსებს ეფუძნება, 1930-იანი წლების ნიუ-იორკში მცხოვრები ასაკოვანი და უიღბლო კერძო გამომძიებლის შესახებ მოგვითხრობს.

ეს ოსკაროსანი ნიკოლას ქეიჯისთვის პირველი მთავარი როლია სატელევიზიო სერიალში. მისი გმირი, ბენ რაილი, იძულებულია საკუთარ წარსულს დაუბრუნდეს, როცა ის ქალაქის ერთადერთი სუპერგმირი იყო. თრეილერში ჩანს, როგორ აღმოაჩენს რაილი თავის ძალებს და უპირისპირდება ირლანდიელ კრიმინალურ ავტორიტეტს (ბრენდან გლისონი). სერიალის ნახვა მაყურებელს სურვილისამებრ შეეძლება როგორც ავთენტურ შავ-თეთრ, ისე ფერად ვერსიაში.

თრეილერი გვაცნობს ქსელის მსროლელ გმირს, რომელიც ქალაქში დაქრის, მანქანებიდან ხტება, ბარში კრიმინალებს უსწორდება და შემდეგ უგონოდ თვრება. მიუხედავად იმისა, რომ ქეიჯმა ეს პერსონაჟი მანამდე ანიმაციაში Spider-Man: Into the Spider-Verse გაახმოვანა, Prime Video-ს სერიალი დამოუკიდებელი ისტორიაა და Sony-ს ანიმაციურ ფილმთან კავშირი არ აქვს.

სერიალის პირველი ორი ეპიზოდის რეჟისორი ჰარი ბრედბირია (Fleabag), პროექტზე კი Into the Spider-Verse-ის ავტორები, ფილ ლორდი, კრისტოფერ მილერი და ემი პასკალი მუშაობდნენ. სპაიდერ-ნუარის პრემიერა 27 მაისს შედგება და ეპიზოდები ერთიანად გამოვა.

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…