თბილისის საქალაქო სასამართლოს მოსამართლემ, ნატო ხუჯაძემ სინდისის პატიმრებს — ანტონ ჩეჩინს, სერგეი კუხარჩუკსა და არტემ გრიბულს პენიტენციურ დაწესებულებაში ბანქოს თამაშის გამო 5 000-5 000-ლარიანი ჯარიმები დააკისრა. სამივე მათგანმა ბრალი აღიარა, ხოლო პროკურატურამ ბრალის აღიარების საფუძველზე მათ საპროცესო შეთანხმება გაუფორმა.

სამივე მათგანს ბრალი სისხლის სამართლის კოდექსის 378-ე სეკუნდა მუხლის მეორე ნაწილით წარედგინათ, რაც პენიტენციურ დაწესებულებაში აკრძალული საგნით სარგებლობას გულისხმობს. დანაშაული 3-დან 5 წლამდე თავისუფლების აღკვეთას ითვალისწინებს. შემთხვევა №8 პენიტენციური დაწესებულებში 2025 წლის 5 ოქტომბერს მოხდა.

შეგახსენებთ —

  • ანტონ ჩეჩინი — რუსი აქტივისტი, პროევროპული აქციების დროს ნარკოდანაშაულის ბრალდებით დააკავეს და 8,5 წლით პატიმრობა მიუსაჯეს.
  • არტემ გრიბული — დააკავეს მის მეუღლესთან, ანასტასია ზინოვკინასთან ერთად პროევროპული აქციების დროს ნარკოდანაშაულის ბრალდებით და 8,5 წლით პატიმრობა მიუსაჯეს. ანასტასია ზინოვკინაც ანტონ ჩეჩინის მსგავსად რუსი აქტივისტია.
  • სერგეი კუხარჩუკი — დააკავეს 2024 წლის ნოემბრის პროევროპულ აქციებში მონაწილეობისთვის. მას ჯგუფური ძალადობა ედებოდა ბრალად და 2 წლით თავისუფლების აღკვეთა მიუსაჯეს.