2025 წლის ივლისში Coldplay-ს კონცერტი მსოფლიოში ერთ-ერთი ყველაზე განხილვადი საკითხი გახდა, მაგრამ ამის მიზეზი არა თავად Coldplay, არამედ კომპანია Astronomer-ის 2 თანამშრომელი — კრისტინ კაბოტი და ენდი ბაირონი — იყო. ბენდმა "კოცნის კამერით" შემთხვევით კაბოტისა და ბაირონის რომანი გამოააშკარავა.

კრისტინ კაბოტმა ამ გამოცდილების შესახებ ოპრა უინფრისთან ისაუბრა და გაიხსენა, რომ საბედისწერო კონცერტზე ბაირონთან ერთად ყოფნისას ლამის საკუთარ ქმარს — ენდრიუს შეხვდა.

კონცერტზე შევდიოდი და შვილმა მომწერა, რა მაგარია, შენც და მამაც Coldplay-ს კონცერტზე რომ ხართო. ასე გავიგე, რომ თურმე ჩემი მეუღლეც ამ კონცერტზე ყოფილა.

კაბოტი ფიქრობდა იმაზე, თუ რა რეაქცია ექნებოდა ენდრიუს ბაირონთან ერთად რომ შეხვედროდა. თუმცა ჩათვალა, რომ რადგან სტადიონზე მასთან ერთად 55 ათასი ადამიანი იყო, სავარაუდოდ, ერთმანეთს ვერც დაინახავდნენ.

"ჯობდა, ენდრიუს შევხვედროდი", — სიცილით ამბობს კრისტინი.

თუმცა, კაბოტი ამავდროულად ფიქრობს, რომ თავის ქმარს ბაირონის დანახვაზე დიდი რეაქცია არ ექნებოდა. კაბოტის ქმარმა იცოდა, რომ მათ სამსახურიდან ახლო ურთიერთობა ჰქონდათ, ზოგჯერ ერთად სადილობდნენ და სვამდნენ.

იხილეთ ინტერვიუს ფრაგმენტი:

კონცერტის დროს ეკრანზე ჩახუტებული კრისტინი და ბაირონი გამოჩნდნენ. რადგან შერცხვენილი და შეშინებული რეაქცია ჰქონდათ, Coldplay-ს სოლისტის ხუმრობა საიდუმლო რომანის შესახებ ელვის სისწრაფით გავრცელდა ინტერნეტში. მიზეზი კი ის იყო, რომ ამ დროს კაბოტსაც და ბაირონსაც ოჯახები ჰყავდათ.

კონცერტის შემდეგ ყოფილი თანამშრომლების ცხოვრება აირია: კომპანია Astronomer ორივემ დატოვა, მათი პირადი ურთიერთობები კი მთელი მსოფლიოს განხილვის თემა გახდა. კრისტინი ამბობს, რომ მას შემდეგ უამრავი ადამიანი აკრიტიკებდა, ზოგი კი სიკვდილითაც ემუქრებოდა.

როგორც კაბოტმა განაცხადა, მეუღლეს უკვე დაშორებული იყო, როცა კონცერტზე წავიდა და ამ კონცერტზე მისი მეუღლეც სხვა პაემანზე იმყოფებოდა. მას შემდეგ კრისტინი და ენდრიუ ოფიციალურად დაშორდნენ ერთმანეთს. კონცერტზე მომხდარი ინციდენტის შემდეგ არც ბაირონი აღარ გამოჩენილა საჯაროდ მეუღლესთან ერთად.

კრისტინის თქმით, მას და ბაირონს სექსუალური ურთიერთობა არ ჰქონიათ.