ევროკავშირმა საქართველოს დიპლომატიური პასპორტის მფლობელებისთვის უვიზო რეჟიმი შეაჩერა — ამის შესახებ რადიო თავისუფლების ევროპის ბიუროს რედაქტორი რიკარდ იოზვიაკი X-ზე წერს. მისი განმარტებით, წინააღმდეგი მხოლოდ უნგრეთი და სლოვაკეთი იყო და გადაწყვეტილება ძალაში მარტის დასაწყისში შევა.

"ევროკავშირის წევრმა სახელმწიფოებმა საქართველოს დიპლომატიური პასპორტის მფლობელებისთვის უვიზო რეჟიმის შეჩერებას ხმა მისცეს. წინააღმდეგი იყვნენ მხოლოდ უნგრეთი და სლოვაკეთი. გადაწყვეტილება ძალაში მარტის დასაწყისში შევა", — დაწერა იოზვიაკმა.

იოზვიაკმა დეტალებზე "ტვ პირველთან" ისაუბრა. მისი თქმით, ეს გადაწყვეტილება ნიშნავს იმას, რომ დიპლომატიური ან სამსახურებრივი პასპორტის მქონე პირები საზღვარგარეთ მოგზაურობისას ვიზალიბერალიზაციით ვეღარ ისარგებლებენ, მაგრამ ჩვეულბრივი პასპორტით მოგზაურობის წესები არ იცვლება. მისივე თქმით, ეს უვიზო რეჟიმის შეჩერების პირველი ნაბიჯია და თუ მოგვიანებით სიტუაცია არ გაუმჯობესდება, გადაწყვეტილება შესაძლოა მთელ მოსახლეობაზე გავრცელდეს.

"ეს გადაწყვეტილება დღეს ევროკომისიამ მიიღო და ევროკავშირის წევრმა სახელმწიფოებმა. კენჭისყრა დიპლომატებმა ჩაატარეს. გადაწყვეტილებას ჰქონდა კვალიფიციური უმრავლესობა, რაც ნიშნავს რომ უნგრეთის და სლოვაკეთის წინააღმდეგობას აზრი აღარ ჰქონდა. ეს ძალაში მარტიდან შევა. ეს გადაწყვეტილება ნიშნავს იმას, რომ თუ შენ გაქვს საქართველოს დიპლომატიური ან სამსახურებრივი პასპორტი, შენ აღარ ისარგებლებ ვიზალიბერალიზაციით როცა საზღვარგარეთ იმოგზაურებ. მაგრამ თუ გაქვს ჩვეულებრივი პასპორტი, შენ კვლავ შეგიძლია უვიზოდ მოგზაურობა. ეს არის სიმბოლური ნაბიჯი, პირველი ნაბიჯი უვიზო რეჟიმის შეჩერების მექანიზმისა. ევროკავშირმა მკაფიოდ განაცხადა, რომ ჩვენ პირველი დავიწყებთ იმ პირებით, რომლებიც არიან პასუხისმგებელნი შექმნილ მდგომარეობაზე. მოგვიანებით, თუ არ იქნება გაუმჯობესება, ჩვენ გადავხედავთ გადაწყვეტილებას მთელი მოსახლეობის მიმართ. ბევრ წევრ სახელმწიფოს არ სურს მთელი მოსახლეობის დასჯა, იმის გამო რასაც რამდენიმე მაღალჩინოსანი აკეთებს, მაგრამ თუ ამავდროულად არაფერი შეიცვლება, ეს არის ის ინსტრუმენტი, რომელიც შეიძლება მათ გამოიყენონ. ეს არის პასუხი იმ დემოკრატიულ უკუსვლაზე, რასაც ევროკავშირი საქართველოში ხედავს. ევროკავშირი მიდგომას მხოლოდ მას შემდეგ შეცვლის, როცა საქართველოს მთავრობა შეცვლის მიდგომას. ასე რომ მათ ურთიერთობაში უკუსვლა გრძელდება", — განაცხადა იოზვიაკმა