ამაზონის სერიალი Tomb Raider ახალ ეტაპზე გადადის, პროექტს ოფიციალურად შეუერთდნენ ჯეისონ აიზეკსი და სიგურნი ვივერი, რაც სერიალის გუნდს ვიდეოთამაშების ადაპტაციებს შორის ერთ-ერთ ყველაზე ძლიერ შემადგენლობად აქცევს.

ჯეისონ აიზეკსი სერიალში Atlas De Mornay-ს როლს შეასრულებს, ხოლო სიგურნი ვივერი ითამაშებს Evelyn Wallis-ს, იდუმალ და გავლენიან ქალს, რომელიც ლარა კროფტის უნარებითაა დაინტერესებული და მის პოტენციალს საკუთარი მიზნებისთვის იყენებს.

სათავგადასავლო ვიდეოთამაშების ფრენჩაიზი Tomb Raider 1996 წელს შეიქმნა და აერთიანებს კვლევას, თავსატეხებსა და თავგადასავალს. თამაში წლების განმავლობაში რამდენჯერმე განახლდა: კლასიკური თამაშებიდან უფრო რეალისტურ და ნარატიულ ვერსიამდე.

ლარა კროფტი ეკრანზე უკვე არაერთხელ გაცოცხლდა: პერსონაჟი 2001 და 2003 წლებში ითამაშა ანჯელინა ჯოლიმ ფილმებში Lara Croft: Tomb Raider და The Cradle of Life, ხოლო 2018 წელს მთავარი როლი შეასრულა ალისია ვიკანდერმა, რომელმაც პერსონაჟს უფრო მიწიერი და ფიზიკურად მძიმე ინტერპრეტაცია შესთავაზა. Amazon Prime Video-ის სერიალი იქნება ლარა კროფტის პირველი დიდი სერიალი.

ლარა კროფტი — სოფი თერნერი

სერიალის მთავარი როლი, ლარა კროფტი სოფი თერნერს ეკუთვნის. მისი მონაწილეობა პროექტში ჯერ კიდევ შარშან გახდა ცნობილი და Amazon MGM Studios-მა ცოტა ხნის წინ ოფიციალურად დაადასტურა, რომ გადაღებები 2026 წლის 19 იანვარს დაიწყება.

თერნერმა ახლახან თქვა, რომ როლისთვის თითქმის ერთი წელია ფიზიკურად ემზადება და მისი აზრით ეს სერიალი განსაკუთრებული იქნება. "ბევრს ვერ ვიტყვი, მაგრამ ჩემი მომზადება 2025 წლის თებერვალში დაიწყო. უკვე თითქმის ერთი წელია ვვარჯიშობ და იანვარში გადაღებებს ვიწყებთ. ძალიან აღფრთოვანებული ვარ, თავს მზად ვგრძნობ".

მან ცალკე კომენტარიც გააკეთა ლარა კროფტის როლზე, ფილმების წინა ვერსიებზე:

"უსაზღვროდ ბედნიერი ვარ, რომ ლარა კროფტის როლს ვასრულებ. ეს ისეთი პერსონაჟია, რომელიც ძალიან ბევრს ნიშნავს უამრავი ადამიანისთვის და მე ყველაფერს ვდებ ამ როლში. ანჯელინასა და ალისიას ძლიერი შესრულებების შემდეგ ამ როლის მორგება უზარმაზარი პასუხისმგებლობაა, მაგრამ ფიბის ხელმძღვანელობით ჩვენ ძალიან უსაფრთხო ხელში ვართ. მოუთმენლად ველოდები, როდის ნახავთ, რას ვამზადებთ".

ვინ მუშაობს სერიალზე?

სერიალის შემქმნელი, სცენარისტი და თანაშოურანერია ფიბი ვოლერ-ბრიჯი (Fleabag, Killing Eve), რომელიც პროექტზე ჩად ჰოჯთან (Wayward Pines, Good Behavior) ერთად მუშაობს.

ვოლერ-ბრიჯის თქმით, Tomb Raider-ის სამყაროს ეკრანზე გადმოტანა გულისხმობს არა მხოლოდ ფანებისთვის საყვარელი პერსონაჟების დაბრუნებას, არამედ ახალი გმირების დამატებასაც:

"Tomb Raider-ს ბევრი მნიშვნელოვანი პერსონაჟი ჰყავს. ძალიან მიხარია, რომ ეკრანზე გადმოვიტანეთ როგორც ფანებისთვის საყვარელი სახეები, ასევე რამდენიმე ახალი პერსონაჟიც".

Amazon-ის განცხადებით, შოუ Tomb Raider-ის მემკვიდრეობას შეინარჩუნებს და მაყურებელს ახალ თავგადასავლებს შესთავაზებს

სერიალის პრემიერა მოსალოდნელია 2027 წელს, ზუსტი თარიღი ჯერ არ გამოცხადებულა.