როგორც ჩანს, Stranger Things-ის გულშემატკივრებისთვის არცთუ ისე მარტივი დასაჯერებელია, რომ ჩვენი საყვარელი პერსონაჟები ეკრანებზე ბოლოჯერ 1-ელ იანვარს, ფინალურ ეპიზოდში, ვიხილეთ.

ახალ ეპიზოდს იმდენი ადამიანი ელოდებოდა, რომ ნეტფლიქსიც კი გაითიშა.

ფოტო: FirstCuriosity/Reddit

ყველაფერი ფინალური ეპიზოდით უკმაყოფილო მაყურებლებისგან დაიწყო, რომლებიც ვარაუდობდნენ, რომ სერიალის დასასრული მთავარი ბოროტმოქმედის, ვეკნას, მიერ შექმნილი უბრალო ილუზია იყო. მათ იპოვეს "მინიშნებები", რომელთა მიხედვით სერიალის ბონუს ეპიზოდი 7 იანვარს უნდა გამოსულიყო.

გამთენიისას, როცა მაყურებლებმა ბონუს ეპიზოდის ნახვა სცადეს, ნეტფლიქსისგან უცნაური შეტყობინება მიიღეს — "ბოდიშს გიხდით, თქვენს მოთხოვნასთან დაკავშირებით პრობლემებია. მთავარ გვერდზე ბევრ საინტერესო ინფორმაციას იპოვით".

ფოტო: Netflix

კადრი Stranger Things-ის მეხუთე სეზონიდან

კადრი Stranger Things-ის მეხუთე სეზონიდან

ფოტო: Netflix

მალევე გულშემატკივრებმა სოციალურ ქსელებში გადაინაცვლეს, სადაც წერდნენ, რომ ახალ ეპიზოდს სულ ტყუილად ელოდებოდნენ, რადგან "დაფერები იმდენად ცუდი სცენარისტები არიან, ბონუს ეპიზოდის გამოშვებას ვერც კი მოიფიქრებდნენ".

ნეტფლიქსსა და ძმებ დაფერებს ჯერჯერობით კომენტარი არ გაუკეთებიათ.

აქვე შეგახსენებთ, რომ 2016 წელს დაწყებული სერიალი, წელს — მეხუთე სეზონით დაგვირგვინდა. როგორც მეოთხე სეზონი, მეხუთეც რამდენიმე ნაწილად გამოვიდა. პირველი ნაწილი 26 ნოემბერს ვიხილეთ, მეორე ნაწილი 25 დეკემბერს, ხოლო ფინალური ეპიზოდი 1-ელ იანვარს.