ანტიბიოტიკები მედიცინის ერთ-ერთი ყველაზე მნიშვნელოვანი აღმოჩენაა, რადგან მათი მეშვეობით სიცოცხლისთვის საშიში გართულებებისა და დაავადებების თავიდან აცილება გახდა შესაძლებელი. მიუხედავად ამისა, ამ მძლავრ პრეპარატებს სარგებელთან ერთად, დიდი ზიანის მოყენებაც შეუძლია. ამიტომ ანტიბიოტიკების მოხმარება თვითნებურად ან სწორად გაწერილი გეგმის გარეშე დაუშვებელია.

სტატიაში, რომელსაც ფარმაცევტული კომპანია სმარტფარმი წარმოგიდგენთ, გაგაცნობთ იმ საფრთხეებს, რომლებიც შეიძლება არასწორ ანტიბიოტიკოთერაპიას მოჰყვეს და გასწავლით წესებს, რომელთა დაცვაც ამ პროცესში განსაკუთრებით მნიშვნელოვანია.

რატომ არის საშიში ანტიბიოტიკებით თვითნებური მკურნალობა?

პირველ რიგში, ერთი უმნიშვნელოვანესი საკითხი უნდა დავაზუსტოთ — ანტიბიოტიკები მხოლოდ ბაქტერიების განადგურებასა და მათი გამრავლების შეჩერებას უზრუნველყოფს, ამიტომ ისინი ბაქტერიული ინფექციების დროს გამოიყენება. შესაბამისად, ანტიბიოტიკები არაეფექტურია ვირუსების წინააღმდეგ ან სხვა მიკროორგანიზმებით გამოწვეული ინფექციების დროს.

მათმა თვითნებურად გამოყენებამ შეიძლება გამოიწვიოს:

• ძლიერი გვერდითი მოვლენები — ანტიბიოტიკები ზოგჯერ იწვევს დისკომფორტს კუჭ-ნაწლავში, დიარეას, თავბრუსხვევას ან ალერგიულ რეაქციებს. ამ მედიკამენტების არასწორად მიღებისას ეს მოვლენები შეიძლება უფრო მწვავედ გამოვლინდეს.
• სხვა ნივთიერებებთან არასწორი ურთიერთქმედება — ზოგიერთი ანტიბიოტიკი შეიძლება რეაქციაში შევიდეს სხვა წამლებთან, ვიტამინებთან და დანამატებთან, რაც ნივთიერებების ეფექტიანობის შემცირებას ან სხვადასხვა ტიპის ჯანმრთელობის პრობლემებს იწვევს.
• ინფექციის გამწვავება — პრეპარატის ან მისი დოზის არასწორად შერჩევამ შეიძლება ბაქტერიების განადგურების ნაცვლად, მათ გაძლიერებას შეუწყოს ხელი. ეს კი, ცხადია, მკურნალობის პროცესსაც გაართულებს და დიდი ალბათობით ჯანმრთელობის სხვა პრობლემებსაც გამოიწვევს.
• ანტიბიოტიკორეზისტენტობა — მკურნალობის არასრული კურსის დროს ხშირად ბაქტერიები ბოლომდე არ ნადგურდება. ორგანიზმში დარჩენილი ბაქტერიები კი გრძელვადიან პერსპექტივაში რეზისტენტული ხდება ანტიბიოტიკების მიმართ, რაც ართულებს ინფექციების მკურნალობას. ასეთ დროს ზოგჯერ მათ გასანადგურებლად უფრო ძლიერ პრეპარატებს მიმართავენ. ეს კი ლეტალური გართულებების რისკს მნიშვნელოვნად ზრდის.

ანტიბიოტიკების მიღების 5 უმნიშვნელოვანესი წესი

როგორ მივიღოთ ანტიბიოტიკები? – ეს არის ერთ-ერთი ყველაზე ხშირად დასმული კითხვა, რომელზე პასუხის გაცემასაც ქვემოთ შევეცდებით. მაშ ასე, გავეცნოთ 5 ყველაზე მნიშვნელოვან წესს, რომელთა დაცვაც ანტიბიოტიკოთერაპიის დროს გვმართებს:

● მიიღეთ ანტიბიოტიკები მხოლოდ ექიმის დანიშნულებით — ამ ტიპის პრეპარატების მიღების აუცილებლობა ექიმმა უნდა დაადასტუროს, კონკრეტულად, დარწმუნდეს, რომ ინფექცია ბაქტერიითაა გამოწვეული და არა სხვა ცოცხალი ორგანიზმით. ასევე, უნდა განისაზღვროს ბაქტერიის ტიპი, იმისთვის, რომ პრეპარატი სწორად შეირჩეს.

• ზედმიწევნით დაიცავით ექიმის მიერ განსაზღვრული დოზები და მიღებებს შორის ინტერვალი — ანტიბიოტიკების ეფექტიანობა დიდწილად დოზასა და მიღების ინტერვალზეა დამოკიდებული. დიდი დოზის შემთხვევაში შეიძლება ჯანმრთელობასაც მივაყენოთ ზიანი და ვერც ბაქტერიების განადგურების პროცესს შევუწყოთ ხელი. მეორე მხრივ, მცირე დოზებით ან დიდი ინტერვალებით მკურნალობისას არსებობს ბაქტერიების გადარჩენის რისკი, რაც ზრდის ანტიბიოტიკორეზისტენტობის ალბათობას.
• გაიარეთ ანტიბიოტიკოთერაპიის კურსი სრულად — ანტიბიოტიკების მოხმარებიდან რამდენიმე დღეში სიმპტომები შეიძლება საგრძნობლად შემსუბუქდეს ან საერთოდ გაქრეს, თუმცა ეს მკურნალობის შეწყვეტის საფუძველი არ უნდა გახდეს. კურსის არასრულად გავლის გამო, შესაძლოა ინფექციამ მოგვიანებით ისევ იჩინოს თავი. აღსანიშნავია, რომ განმეორებითი ინფექციის მკურნალობა, როგორც წესი, უფრო რთულია.
• დაიცავით პრეპარატების მიღების წესები — მაგალითად, ზოგიერთი ანტიბიოტიკი უკეთ შეიწოვება უზმოზე, ზოგი კი საკვებთან ერთად. გარდა ამისა, მისი მიღების წესების დაცვით შეგეძლებათ მინიმალურად შეამციროთ გვერდითი მოვლენების გამოვლენის ალბათობა.
• მკურნალობის პერიოდში შეიკავეთ თავი ალკოჰოლის მიღებისგან — ალკოჰოლი ხშირად არა მხოლოდ ამცირებს პრეპარატების ეფექტიანობას, არამედ აძლიერებს ანტიბიოტიკების გვერდით მოვლენებსაც. ამიტომ მკურნალობის დროს ნებისმიერი ალკოჰოლი, თუნდაც მცირე რაოდენობით, რეკომენდებული არაა.

დაიცავით ჩვენ მიერ ჩამოთვლილი წესები და ზედმიწევნით მიჰყევით სპეციალისტის დანიშნულებას, რათა ჯანმრთელობის დაზიანების გარეშე მიიღოთ ანტიბიოტიკებისგან მაქსიმალური სარგებელი.

გაუფრთხილდით სხვებისა და საკუთარ ჯანმრთელობას!