საქართველოს ბანკი ეროვნული საკალათბურთო ნაკრების მთავარი სპონსორია.

საქართველოს ნაკრები 2027 წლის მსოფლიო ჩემპიონატის შესარჩევ ეტაპზე ასპარეზობას იწყებს. 27 ნოემბერს, ქართველი კალათბურთელები ჯერ თბილისში უკრაინას უმასპინძლებენ, შემდეგ კი, 30 ნოემბერს, ესპანეთს ესტუმრებიან. ოლეკსანდარ ჯიკიჩის მიერ გაწვრთნილი საქართველოს ეროვნული ნაკრები A ჯგუფშია წარმოდგენილი, სადაც ჯგუფიდან გასასვლელად დანიის ნაკრების წინააღმდეგაც იბრძოლებს.

2027 წლის მსოფლიო ჩემპიონატს კატარი მასპინძლობს. ტურნირზე მონაწილეობას 32 გუნდი მიიღებს (ტურნირზე ევროპის ზონიდან 12 ადგილია გამოყოფილი). საკვალიფიკაციო ეტაპი ორ რაუნდად არის დაყოფილი და ორივე მათგანი ჯგუფური სისტემით ჩატარდება.

როგორ მოვხვდეთ მსოფლიო ჩემპიონატზე?

პირველ რაუნდში, 24 ევროპული ნაკრები 4-გუნდიან ჯგუფებში გადანაწილდა. თითოეული ნაკრები 6 შეხვედრას გამართავს (შინ და გასვლაზე). 1-3 პოზიციაზე გასულები მეორე რაუნდში გადაინაცვლებენ, სადაც ოთხი 6-გუნდიანი ჯგუფი ჩამოყალიბდება.

პირველი ეტაპის გამარჯვებულები მე-2 ეტაპზე მხოლოდ იმ გუნდებს დაუპირისპირდებიან, რომლებსაც მანამდე არ შეხვედრიან. მნიშვნელოვანია, რომ პირველ რაუნდში დაგროვებული ქულები გუნდებს მეორე რაუნდშიც გადაჰყვებათ. ასე რომ, A ჯგუფში ჩატარებულ თითოეულ მატჩს დიდი მნიშვნელობა ენიჭება.

იმისთვის, რომ საქართველო მსოფლიო პირველობაზე ზედიზედ მეორედ მოხვდეს, საჭიროა, რომ ჯერ A ჯგუფში საუკეთესო სამ ნაკრებს შორის მოხვდეს, შემდეგ კი მეორე რაუნდში, 6 გუნდს შორის, მინიმუმ 1-3 ადგილი დაიკავოს. ეს შედეგი კატარის საგზურს დანამდვილებით უზრუნველყოფს.

FIBA-ზე გამოქვეყნებული სტატიის თანახმად, A ჯგუფის მთავარი აუტსაიდერი დანიაა, ხოლო 1-2 პოზიცია, სავარაუდოდ, ესპანეთმა და საქართველომ უნდა გადაინაწილონ.

ვის შევხვდებით მეორე რაუნდში?

ფორმატის თანახმად, მე-2 რაუნდში ჯგუფები შემდეგნაირად დაკომპლექტდება:

• A და B ჯგუფების 3-3 საუკეთესო ნაკრები → I ჯგუფს ჩამოაყალიბებს
• C და D → J
• E და F → K
• G და H → L

ამ განაწილებით, გამოდის, რომ თუკი საქართველომ პირველი რაუნდი წარმატებით დაძლია, მორიგ შეხვედრებს B ჯგუფის 3 საუკეთესო გუნდთან გამართავს (შინ და გასვლაზე). ჩვენი პოტენციური მეტოქეები B ჯგუფიდან კი პორტუგალია, მონტენეგრო, საბერძნეთი და რუმინეთი არიან.

როდის გაიმართება პირველი რაუნდის შეხვედრები?

• 27 ნოემბერი, 20:50 | საქართველო v უკრაინა;
• 30 ნოემბერი, 22:45 | ესპანეთი v საქართველო;
• 27 თებერვალი | დანია v საქართველო;
• 3 მარტი | საქართველო v დანია;
• 2 ივლისი | უკრაინა v საქართველო;
• 5 ივლისი | საქართველო v ესპანეთი.

ერთად ვუგულშემატკივროთ ქართველ კალათბურთელებს. საქართველოს ბანკი ეროვნული საკალათბურთო ნაკრების მთავარი სპონსორია.