მოლდოვას ცენტრალურმა საარჩევნო კომისიამ საპარლამენტო არჩევნებში მონაწილეობა ორ პრორუსულ პარტიას — მოლდოვას გული და დიდი მოლდოვა — აუკრძალა. ამის შესახებ ინფორმაციას Aljazeera ავრცელებს.

გადაწყვეტილება პარასკევს გამოცხადდა და ის უკავშირდება ბრალდებებს უკანონო დაფინანსებაში, ამომრჩეველთა მოსყიდვაში და დაუფიქსირებელ უცხოურ სახსრებში. ორივე პარტია მოსკოვთან დაახლოებას უჭერდა მხარს და პროდასავლური მთავრობის მთავარი ოპონენტები იყო.

მოლდოვას გულის არჩევნებში მონაწილეობის აკრძალვა კიშინიოვის სააპელაციო სასამართლოს გადაწყვეტილებას მოჰყვა, რომელმაც პარტიის საქმიანობა 12 თვით შეზღუდა. იუსტიციის სამინისტრომ ეს მას შემდეგ მოითხოვა, რაც სექტემბრის დასაწყისში ჩატარებულმა ჩხრეკებმა ფულის გათეთრების, უკანონო დაფინანსებისა და ამომრჩეველთა მოსყიდვის მცდელობებში ბრალდებები გამოავლინა.

პარტიამ ბრალდებები უარყო და ეს ნაბიჯი "პოლიტიკურ წმენდად" შეაფასა.

"ეს არ არის სამართალი, არამედ ბინძური შოუს ბოლო აქტი, რომელიც ხელისუფლებამ წინასწარ დადგა ერთადერთი მიზნისთვის — რომ ჩვენი ხმა ჩაეხშო," — ნათქვამია პარტიის განცხადებაში.

პარტიის ლიდერმა, ირინა ვლახმაც, დაგმო სასამართლოს გადაწყვეტილება და მას "პოლიტიკური სპექტაკლი" უწოდა, რომელიც მმართველმა პარტიამ "დიდი ხნის წინ გამოიგონა".

საარჩევნო კომისიამ ასევე აღნიშნა, რომ მოლდოვას გულის მიერ წარდგენილი ყველა კანდიდატი მოიხსნება რუსეთთან მეგობრული "პატრიოტული საარჩევნო ბლოკიდან"(BEP), რომელიც მმართველი პარტიის, "ქმედებისა და სოლიდარობის" (PAS) ერთ-ერთი მთავარი კონკურენტი იყო. ბლოკს 24 საათი მიეცა, რათა კანდიდატების სია შეეცვალა და არჩევნებში მონაწილეობის უფლება შეენარჩუნებინა.

იმავე დღეს, კომისიამ დიდი მოლდოვაც აკრძალა, ამომრჩეველთა მოსყიდვის, უცხოური დაფინანსების დამალვის და აკრძალულ პარტიასთან კავშირში არსებული "კამუფლაჟირებული საარჩევნო ბლოკის" საქმიანობაში მონაწილეობის ბრალდებებით.

რუსეთმა, რომელსაც მოლდოვის დესტაბილიზაციაში ხშირად ადანაშაულებენ, ბრალდებები "ანტირუსულ" და "უმიზეზო" ნაბიჯად შეაფასა.