ქართული ოცნების ვანის საკრებულოს დეპუტატს და კომპანია B.P TRANS-ის მფლობელს, ბიჭიკო პაიკიძეს სახელმწიფო თანხების, რეგიონული განვითარებისა და ინფრასტრუქტურის სამინისტროს კუთვნილი 4 მლნ-ზე მეტი ლარის თაღლითური მითვისებისთვის, აღმკვეთი ღონისძიების სახით პატიმრობა შეეფარდა. ამავე ბრალდებით პატიმრობა შეეფარდა კომპანიის მეორე დირექტორს, ვალერიან კვარაცხელიას და კიდევ 4 პირს — იოსებ ჭანჭალეიშვილს, როინ ფოფხაძეს, გიორგი კვახაძეს და ირაკლი გალოგრეს.

პროკურორ ბექა ხუნაშვილის განცხადებით, კომპანია B.P. TRANS- ის მფლობელი, ვანის საკრებულოში ქართული ოცნების დეპუტატი ბიჭიკო პაიკიძე სავარაუდოდ, ესპანეთში ან პორტუგალიაში ცდილობდა გადასვლას, რათა ის გამოძიებას მიმალვოდა.

ბიჭიკო პაიკაიძე სუს-ის ყოფილი ხელმძღვანელის, გრიგოლ ლილუაშვილის ახლობელია, უფრო ზუსტად, "რადიო თავისუფლების" ცნობით, მან გრიგოლ ლილუაშვილს შვილი მოანათვლინა.

ამჟამად პაიკიძე საქართველოში არ იმყოფება, შესაბამისად მას აღმკვეთი ღონისძიება დაუსწრებლად შეეფარდა. როგორც პაიკიძის ადვოკატი, ირმა ჭკადუა აცხადებს, მისი დაცვის ქვეშ მყოფმა ქვეყანა ჯანმრთელობის პრობლემების გამო დატოვა და საერთოდ არ არის ეს დაკავშირებული იმ სასამართლო დავასთან, რაც მის წინააღმდეგ მიმდინარეობს. სუს-ის განცხადებით, ბიჭიკო პაიკიძეზე ძებნაა გამოცხადებული.

"ბიჭიკო პაიკიძეს დაუსწრებლად წარედგინა ბრალდება. მას ედავებიან გარკვეული თანხების მითვისებას, მასალა მოცულობითია, დაახლოებით, 21 ტომია. ბიჭიკო პაიკიძე საზოგადოებისთვის ცნობილი პიროვნებაა, მისი უშუალო ჩართულობით ხდებოდა შოვის ტრაგედიის სალიკვიდაციო სამუშაოების, ყველა ტრაგედია, სტიქია, რაც საქართველოში ხდებოდა, სალიკვიდაციო სამუშაოებს ის ატარებდა, ის ყველაფერს მისი ქვეყნის სასარგებლოდ აკეთებდა.

ბატონი პაიკიძე არავის მხრიდან გაფრთხილებული არ ყოფილა, მის მიერ საქართველოს დატოვება მხოლოდ და მხოლოდ ჯანმრთელობის მდგომარეობას უკავშირდება, საგამოძიებო ორგანოსთვის ცნობილია, რომ მას ძალიან ხშირად უფიქსირდებოდა საზღვრის კვეთა, რომელიც ჯანმრთელობის მდგომარეობას უკავშირდებოდა. მას არაერთი ქირურგიული ჩარევა აქვს გაკეთებული. ახლა სად იმყოფება, ჩემთვის ცნობილი არ არის, რომც ვიცოდე, ვერც მოგახსენებთ.

დავინტერესდი ექსპერტიზის დასკვნით, შესრულებული სამუშაოებია შეფასებული და ის მარტივი ფორმულით არის დაანგარიშებული. დაცვასაც ექნება შესაძლებლობა დამატებით ჩაატაროს ექსპერტიზები.

მისი საკომუნიკაციო მონაცემები არ მაქვს, არც მინდა მქონდეს. ბატონი პაიკიძე ამ საქმეზე გამოკითხული არ არის", — განაცხადა ირმა ჭკადუამ (კომენტარს IPN ავრცელებს).

რაც შეეხება საქმეს, სახელმწიფო უსაფრთხოების სამსახურის განცხადებით, 2021 წლის ივნისიდან 2022 წლის სექტემბრის ჩათვლით, ქუთაისი-ალპანა-მამისონის გზისა და ონის მუნიციპალიტეტის ტერიტორიაზე სტიქიით დაზიანებული მონაკვეთების ნაპირდამცავი სამუშაოების შესრულებისას, შპს B.P. TRANS-ის 100%-იანი წილის მფლობელმა ბიჭიკო პაიკიძემ, ვალერიანე კვარაცხელიასთან, კომპანიის თანამშრომელ ი.ჭ.-სთან და ხელშეკრულების შესრულებაზე პასუხისმგებელ ზედამხედველ პირებთან — გ.კ.-ს, რ.ფ.-ს და ი.გ.-ს — ერთად, მოტყუებით მოიპოვა საქართველოს რეგიონული განვითარებისა და ინფრასტრუქტურის სამინისტროს კუთვნილი 4 184 249 ლარი.

ბიჭიკო პაიკიძეს დამატებით კიდევ ერთი ბრალი წარედგინა — განსაკუთრებით დიდი ოდენობით გადასახადისათვის განზრახ თავის არიდება და მასზეც პატიმრობა შეეფარდა. ადვოკატ ირმა ჭკადუას განცხადებით, პაიკიძეს ბრალად ედება 2010-2012 წლებში საგადასახადოში დეკლარაციების არასწორად შევსება. ადვოკატის განმარტებით, ამ ბრალზე "საუბარი უხერხულია და ეს უხერხული დამთხვევაა, რადგან მაშინ ნაციონალური მოძრაობის რეჟიმი მძვინვარებდა, ისინი ყველას აკავებდნენ და თუკი, ამ ტიპის დანაშაული იყო მომხდარი, პაიკიძეს აუცილებლად დააკავებდნენ".