საქართველოს სახალხო დამცველი მიიჩნევს, რომ სექტემბრის თვეში სამუშაო ადგილზე დაღუპულთა სტატისტიკა საგანგაშოა და ხელისუფლებისგან დაუყოვნებლივ მოითხოვს მკაცრი ზომების მიღებას. სექტემბრის თვის განმავლობაში, სამუშაო ადგილზე ოთხი მუშა დაიღუპა, ხუთი კი დაშავდა:

"ამ დრომდე არ ჩანს მყარი პოლიტიკური ნება ეფექტიანი შრომის ინსპექციის დროულად შესაქმნელად. ნაცვლად პრევენციული ღონისძიებების გატარებისა, სახელმწიფო პასიურ როლშია, ამავდროულად, ვერ ხერხდება ადეკვატური რეაგირება უკვე მომხდარ შემთხვევებზე".

ომბუდსმენის განცხადებით, მიმდინარე წლის პირველ ივნისს ინიცირებული მთავრობის კანონპროექტი სერიოზულ ხარვეზებს შეიცავს:

"კანონპროექტის წარმოდგენილი რედაქციით, მისი ძირითადი დებულებები პრაქტიკაში მიღებიდან მხოლოდ ერთი წლის შემდეგ ამოქმედდება, რაც ასევე დიდი დროა და გადახედვას საჭიროებს".

სახალხო დამცველი მოუწოდებს სახელმწიფო სტრუქტურებს, პრიორიტეტულად მიიჩნიონ უსაფრთხო სამუშაო გარემოს დროულად უზრუნველყოფა ქვეყანაში, დაუყოვნებლივ გაატარონ ზომები ეფექტიანი შრომის ინსპექციის შესაქმნელად და მის პრაქტიკაში ასამოქმედებლად.