საქართველოს 2018 წლის ბიუჯეტის პროექტის მიხედვით, თავდაცვის სამინისტრო ბიუჯეტი შეიძლება, 46 მილიონი ლარით შემცირდეს და 702 მილიონი გახდეს. აქედან, საბიუჯეტო სახსრებს 680 მილიონი ლარი წარმოადგენს, 22 მილიონი კი კრედიტია. ამავე დროს, 265 ადამიანით, 41 992-მდე შემცირდება მომუშავეთა რაოდენობა.

ყველაზე დიდი თანხა თავდაცვის მართვაზე დაიხარჯება - 312,4 მილიონი ლარი. 11 მილიონით, შესაძლოა, შემცირდეს ინფრასტრუქტურის განვითარების დაფინანსება და ჯამში, ამ მიმართულებისთვის 21 მილიონი გამოიყოს.

თითქმის ხუთი მილიონით გაიზრდება სამხედრო სამშვიდობო მისიების დაფინანსება და 40,5 მლნ გახდება.

151,3 მილიონი ლარი იქნება გამოყოფილი ლოგისტიკური უზრუნველყოფისთვის. აღსანიშნავია, რომ 2017 წლის ბიუჯეტში მსგავსი პროგრამა გაწერილი არ იყო. საქართველოს შეიარაღებული ძალების გაერთიანებულ შტაბს აქვს სტრუქტურული ქვედანაყოფი - ლოგისტიკის უზრუნველყოფის დეპარტამენტი. დეპარტამენტი 2007 წელს თავდაცვის ყოფილი მინისტრის, დავით კეზერაშვილის დროს.

დეპარტამენტის ფუნქციებია სამხედრო ქვედანაყოფების საბრძოლო მზადყოფნის, საბრძოლო და ოპერატიული მომზადების გეგმების შედგენა და ჯარის უზრუნველყოფა შეიარაღებით, ტექნიკით და სხვ.

თავდაცვის ბიუჯეტი წლების განმავლობაში ასე იცვლებოდა:

  • 2015 წელი - 679 707 000;
  • 2016 წელი - 745 977 200;
  • 2017 წელი - 748 000 000;
  • 2018 წელი - 702 000 000 (ბიუჯეტის პროექტის მიხედვით).

სახელმწიფო ბიუჯეტის პროექტი საქართველოს პარლამენტმა უნდა განიხილოს და დეკემბერში უნდა დაამტკიცოს.