მომღერალმა ტეილორ სვიფტმა აშშ-ის პრეზიდენტის, დონალდ ტრამპის რეკორდი მოხსნა — სუპერვარსკვლავმა პოდკასტის ეპიზოდის გამოქვეყნებიდან პირველი საათის განმავლობაში მსმენელთა რაოდენობით მსოფლიოში პირველი ადგილი დაიკავა, რომელსაც აქამდე ტრამპი ფლობდა.

გასულ ოთხშაბათს სვიფტი გამოჩნდა პოდკასტში New Heights, რომელსაც მისი შეყვარებული, ამერიკული ფეხბურთის ჩემპიონი, ტრევის კელსი და მისი ძმა, ჯეისონ კელსი უძღვებიან. ორ საათზე გრძელი პოდკასტის ეპიზოდში სვიფტმა თავის მომავალ ალბომზე, The Life of A Showgirl-ზე, მის კონცეფციაზე, ვიზუალურ სტილზე და მუშაობის პროცესზე ისაუბრა, რის გამოც პოდკასტს მისი უამრავი ფანი უსმენდა.

The Daily Beast-ის ცნობით, რაც სვიფტის წარმომადგენლებმაც დაადასტურეს, პოდკასტს პირველი საათის განმავლობაში პირდაპირ ეთერში 1.3 მილიონი ადამიანი უყურებდა.

ეს განსაკუთრებით მნიშვნელოვანია, რადგან სვიფტამდე ტრამპს ეკავა რეკორდი პირველი საათის განმავლობაში პოდკასტზე მსმენელების რაოდენობით. 2024 წლის ოქტომბერში ის სტუმრად იყო ჯო როგანის პოპულარულ პოდკასტში Joe Rogan Experience, სადაც CNN-ის ანალიტიკოს ჰარი ენტენის მონაცემებით, გამოქვეყნებიდან პირველ საათის განმავლობაში ეპიზოდს 800,000-მა ადამიანმა უყურა.

სვიფტის New Heights-ის ეპიზოდზე ასეთი მასობრივი ინტერესის გამო YouTube-ს ტრანსლაციაც კი შეფერხდა ეპიზოდის გამოქვეყნებიდან დაახლოებით 1 საათსა და 44-ე წუთზე.

სვიფტმა ტრამპის რეკორდი იქიდან სამი თვის შემდეგ მოხდა, რაც აშშ-ის 47-ე პრეზიდენტმა საკუთარ სოციალურ ქსელზე, Truth Social-ზე განაცხადა, რომ სვიფტის პოპულარობა მისი წყალობით კლებულობდა.

"ვინმემ შეამჩნია, რომ მას შემდეგ, რაც ვთქვი: "მე მეზიზღება ტეილორ სვიფტი", ის აღარ არის მოთხოვნადი?" — დაწერა ტრამპმა მაისში.

ტრამპმა სვიფტისადმი საჯაროდ გამოხატული უარყოფითი დამოკიდებულება პირველად 2024 წლის სექტემბერში გამოავლინა, მას შემდეგ, რაც სვიფტმა 2024 წლის საპრეზიდენტო არჩევნებში მხარი კამალა ჰარისს დაუჭირა. მას შემდეგ, ტრამპი პერიოდულად კვლავ აკეთებდა ირონიულ შენიშვნებს პოპვარსკვლავზე.

სვიფტს არასოდეს გაუკეთებია საჯარო კომენტარი ტრამპის განცხადებებზე მის შესახებ.