კატა უამრავი ადამიანის საყვარელი ცხოველია, თუმცა ბევრი საკმაოდ უარყოფითად არის მათ მიმართ განწყობილი. ამის მიზეზი ხშირად ისაა, რომ ამ ადამიანებს კატების შესახებ მცდარი მოსაზრებებისა და მითების სჯერათ. წარმოგიდგენთ ამ მითებიდან რამდენიმეს, რომლებიც, სავარაუდოდ, თქვენც მართალი გგონიათ.

1. კატები ღამის ცხოველები არიან

არა, კატები ღამის ცხოველები არ არიან. მართალია, შეიძლება ხშირად გვახტებიან ღამის 3 საათზე თავზე, თუმცა კატები სინამდვილეში ყველაზე ფხიზლად გამთენიისას და დაღამებისას არიან. ეს კი იქიდან გამომდინარეობს, რომ მათი ბუნებრივი მსხვერპლიც სწორედ ამ დროსაა ფხიზელი.

დროის განმავლობაში შეგიძლიათ, რომ თქვენი კატა თქვენს ძილის რეჟიმს მიაჩვიოთ. ამისთვის საჭიროა, რომ ყოველდღიურად ერთი და იმავე დროს აჭამოთ და რიტმში ჩააყენოთ.

2. კატების გაწვრთნა შეუძლებელია

კატებისა და ძაღლების ექსპერტი და მწვრთნელი რასელ ჰარტსტეინი გვაცნობებს, რომ ზუსტად ისევე შეიძლება კატების გაწვრთნა, როგორც ძაღლების, თუმცა ამას ბევრი ადამიანი არ აკეთებს, რადგან არ იციან — როგორ, ან ამ მითის სჯერათ.

3. კატებს ნაკლები მოვლა სჭირდებათ

ესეც ტყუილია, კატებს სხვა შინაურ ცხოველებზე ნაკლები მოვლა არ სჭირდებათ. კატებს, რომლებიც სახლებში ცხოვრობენ, დიდი ყურადღება, გართობა და სითბო სჭირდებათ იმისთვის, რომ ბედნიერები და ჯანმრთელები იყვნენ.

4. კატებს მარტო ყოფნა უყვართ და ძაღლებივით თბილები არ არიან

როცა კატებისა და ძაღლების ქცევებს ვადარებთ, კატებს ხშირად მარტოსულებად, ზედმეტად დამოუკიდებლებად და ზოგჯერ ცივ ცხოველებადაც კი ვთვლით. თუმცა, არც ისე სამართლიანია, რომ მხოლოდ იმიტომ, რომ მათი ცხოვრების მთავარი მიზანი ადამიანების გაბედნიერება არაა, მათ ასე განვსჯით.

კატის პერსპექტივიდან თუ დააკვირდებით, მიხვდებით, რომ კატებს ყველაზე მეტად სწორედ ადამიანებთან და სხვა ცხოველებთან ურთიერთობა აბედნიერებთ და სიყვარულიც ძალიან კარგად შეუძლიათ. ისინი უბრალოდ ძაღლებისგან განსხვავებულად გამოხატავენ ამ სიყვარულს.

5. კატის კრუტუნი ბედნიერების ნიშანია

თუ კატა გვერდით გიწევთ და მოფერებისას კრუტუნებს, ეს ძირითადად იმის ნიშანია, რომ ბედნიერია, თუმცა კატის კრუტუნი შეიძლება ბედნიერების გარდა მრავალი სხვა რამის მანიშნებელიც იყოს. კატები კრუტუნებენ, როცა ეშინიათ ან საფრთხე ემუქრებათ, კრუტუნებენ როცა სტკივათ, როცა დაშავებულები არიან, როცა მშობიარობენ და მაშინაც კი, როცა სიკვდილის პირას არიან.