ტედ ლასოს მეოთხე სეზონის გადაღება ოფიციალურად დაიწყო.

Apple TV+ ავრცელებს ინფორმაციას, რომ კომედიური სერიალის მეოთხე სეზონის გადაღებები კანზასში მიმდინარეობს, თუმცა ეპიზოდების ნაწილის გადაღება ლონდონშიც იგეგმება.

იხილეთ პირველი კადრები ახალი სეზონიდან:

@appletv We’re not in Richmond anymore. Ted Lasso Season 4 is now in production. #TedLasso #JasonSudeikis #HannahWaddingham #JeremySwift #JunoTemple #AppleTV #AppleTVPlus ♬ original sound - Apple TV

უკვე დადასტურდა ინფორმაცია, რომ ამ სეზონში დაბრუნდებიან მსახიობები: ჯეისონ სუდეიკისი, ჰანა უოდინგემი, ჯუნო ტემპლი, ბრეტ გოლდშტეინი, ბრენდან ჰანტი და ჯერემი სვიფტი.

ტედ ლასოს მსახიობები

ფოტო: Apple TV+

გარდა ამისა, ტედ ლასოს შეუერთდებიან ტანია რეინოლდსი, ჯუდ მაკი, ფეი მარსეი, რექს ჰეისი, აისლინგ შარკი, ები ჰერნი და გრანტ ფილი. ახალბედა პერსონაჟების ზუსტი დეტალები ჯერ-ჯერობით საიდუმლოდ ინახება, თუმცა ცნობილია, რომ ფილი ტედის შვილის, ჰენრი ლასოს როლს შეასრულებს.

ტედ ლასოს ახალი მსახიობები

მეოთხე სეზონის მოკლე მიმოხილვა გვეუბნება:

“ტედი რიჩმონდში ბრუნდება, სადაც თავისი ცხოვრების ყველაზე დიდ გამოწვევას იღებს — ხდება მეორე დივიზიონის ქალთა გუნდის მწვრთნელი ფეხბურთში. სეზონის განმავლობაში ტედი გუნდთან ერთად სწავლობს, როგორ გადადგას ნაბიჯები ბევრი ფიქრის გარეშე და ისინი ერთად ისეთ რისკებზე მიდიან, რასაც მანამდე ვერც კი წარმოიდგენდნენ”.

ბრეტ გოლდშტეინი, ჯეისონ სუდეიკისი და ბრენდან ჰანტი ტედ ლასოს მე-3 სეზონში

ფოტო: Apple TV+

მეოთხე სეზონის აღმასრულებელი პროდიუსერები იქნებიან: ჯეისონ სუდეიკისი, ჯეკ ბურდიტი, ჯო კელი, ბრენდან ჰანტი, ჯეინ ბეკერი, ჯეიმი ლი და ბილ ვრუბელი. ბრეტ გოლდშტეინი და ლიან ბოუენი პროდიუსერობასთან ერთად სცენარისტების ფუნქციასაც შეასრულებენ.

სერიალის დებიუტი 2020 წელს შედგა, მისი მესამე სეზონი კი 2023 წელს გამოვიდა. ტედ ლასომ მალევე მიიზიდა უამრავი მაყურებელი — ნაწილობრივ ალბათ იმიტომ, რომ მისი მთავარი გმირი იმ დროს ცდილობდა სიხარულისა და ბედნიერება გავრცელებას, როცა მთელი მსოფლიო COVID-19-ის პანდემიის ურთულეს ეტაპს გადიოდა.

ტედ ლასომ ამ წლების განმავლობაში ემის 61 ნომინაცია მოიპოვა, მათგან კი 13 მოიგო. სერიალი არაერთხელ დაჯილდოვდა საუკეთესო კომედიური სერიალის კატეგორიაში. ჯილდოები დაიმსახურეს სუდეიკისმა და გოლდსტეინმაც.

ემის 2021 წლის დაჯილდოება

ემის 2021 წლის დაჯილდოება

ფოტო: Getty Images

ამჟამად უცნობია, ზუსტად როდის გამოვა მეოთხე სეზონი, თუმცა მას სავარაუდოდ 2026-2027 წლებამდე არ უნდა ველოდოთ.