თბილისის საქალაქო სასამართლოში, პროევროპულ აქციებში მონაწილეობისთვის დაკავებული ანრი კვარაცხელიას დასკვნითი პროცესი გაიმართა. მოსამართლე ჯვებე ნაჭყებიამ 26 წლის ანრი კვარაცხელიას 4,5 წელი მიუსაჯა.

კვარაცხელიას გდდ-ს თანამშრომლისთვის ე.წ მოლოტოვის კოქტეილის სროლას ედავებოდნენ, რაც 4-დან 7 წლამდე პატიმრობას ითვალისწინებს. პროკურატურის განმარტებით ეს "ქმედება" პოლიციელის ჯანმრთელობისთვის საფრთხის შექმნას გულისხმობდა და შესაბამისად საქმე სისხლის სამართლის 353-ე მუხლით განიხილებოდა, რაც პოლიციელზე თავდასხმას გულისხმობს. ანრი კვარაცხელიას საქმეში დაზარალებული პოლიციელი არ არსებობს. პროკურატურის მიერ წარდგენილ კადრებში, დაცვის მხარის მიერ ჩატარებული დამოუკიდებელი ექსპერტიზის ფარგლებში, სამხარაულის ექსპერტიზამ განაცხადა, რომ ვიდეოში არსებული პირის ამოცნობა შეუძლებელია.

განაჩენის გამოცხადებამდე ანრი კვარაცხელიამ დარბაზს მიმართა:

"დიდი მადლობა, რომ ასე შეწუხდით და ჩემს საქმეებზე დადიხართ.

ჩემთვის არსებითი მნიშვნელობა არ აქვს, რა წლებს მომისჯით, ბატონო მოსამართლე, იქიდან გამომდინარე, რომ მე ძაან ამაყი ვარ, რომ ჩემი ქვეყნის გვერდით ვიდექი.
ჩემი საქმე არის შეკერილი, მე ვერც თავი გავიგე და ვერც ბოლო, რას მედავებიან და რის გამო.

კიდევ ერთხელ დიდი მადლობა, რომ ჩემ გვერდით დგახართ. დედიკოს მიმიხედეთ, იქიდან გამომდინარე, რომ ემიგრანტი მყავს. როცა ჩამოვა, დიდი სიყვარულით მომიკითხეთ. კარგად იყავით, მალე შევხვდებით ერთმანეთს. ერთი დიდი ოჯახი ვართ," — განაცხადა ანრი კვარაცხელიამ.

ამ დროისთვის პროევროპულ აქციებში მონაწილეობისთვის დაკავებულ 3 პირს — მათე დევიძეს, გიორგი მინდაძეს, საბა ჯიქიას და ანრი კვარაცხელიას თავისუფლების აღკვეთა მიესაჯა. ოთხივე ბრალდებულს სისხლის სამართლის კოდექსის 353-ე პრიმა მუხლით ედავებოდნენ, რაც პოლიციელზე თავდასხმას გულისხმობს და 4-დან 7 წლამდე პატიმრობას ითვალისწინებს. მათე დევიძეს 4 წელი და 6 თვე მიესაჯა, ხოლო მინდაძეს — 5 წელი, ხოლო საბა ჯიქიას — 4 წლით და 6 თვით.