რომის ესპანურ კიბეზე მიმავალი მანქანა ჰოლივუდის სცენას ჰგავს, თუმცა ეს ვერსია 80 წლის მძღოლს, ნელა მოსიარულე მერსედესსა და ამწეკრანს მოიცავს.

პოლიციის მიერ მოწოდებულ ვიდეომასალაში 80 წლის კაცი მანქანით ეშვება ცნობილ 135 საფეხურიან კიბეზე — მანამ, სანამ ავტომობილი კიბის შუაში არ გაიჭედება. პოლიცია, რომელმაც ცნობილ მონუმენტზე გაჭედილი მერსედესი შეამჩნია, საქმეში 17 ივნისს, გამთენიისას ჩაერთო.

ვიდეოში ჩანს, რომ მანქანა ჯერ ნელა მოძრაობს გზაზე, შემდეგ კი არასწორად უხვევს და ესპანურ კიბეზე აღმოჩნდება გაჭედილი. პოლიციის თქმით, კაცს, რომლის ვინაობასაც არ ამხელენ, ჯერ მანქანიდან გადმოსვლაში დაეხმარნენ, შემდეგ კი ალკოჰოლის ტესტი ჩაუტარეს, რომლის პასუხიც უარყოფითი აღმოჩნდა. იტალიის მედიამ გაავრცელა ინფორმაცია, რომ ამ ინციდენტში მძღოლი არ დაზიანებულა, მაგრამ ძალიან დაბნეული იყო. პოლიციის ინფორმაციით რომის ამ მაცხოვრებელმა ვერც კი ახსნა, რატომ ატარებდა მანქანას კიბეებზე.

მოგვიანებით მისი ავტომობილი ამწეკრანმა მოაშორა კიბეებს — ის იტალიელმა მაშველებმა იხსნეს და თან ამ მომენტის ფოტოც გამოაქვეყნეს.

როგორც პოლიციის განცხადებაში ვკითხულობთ, ინციდენტი გამოძიებისთვისაა გადაგზავნილი.

ფოტო: Vigili del Fuoco/A

ესპანური კიბე, რომელიც იტალიაში ცნობილია, როგორც Scalinata di Trinità dei Monti, რომის ერთ-ერთი ყველაზე ცნობილი სანახაობაა. ის 1720-იან წლებში აშენდა და პოპულარულია როგორც ტურისტებში, ისე კინომოყვარულებში — ამ ადგილას ბევრი ფილმის, მათ შორის 1953 წლის კლასიკის, “რომაული არდადეგების” სცენაა გადაღებული.

თუმცა, ეს კიბეები ასევე ყოფილა უხეში, მოუფრთხილებელი და უპატივცემულო მოპყრობის ობიექტიც. 2019 წლის ივლისში რომაელმა სამართალდამცავებმა გამოაცხადეს, რომ ყველა, ვინც დააზიანებდა, დაანაგვიანებდა ან შეურაცხყოფდა რომის ხელოვნებისა და ისტორიის ძეგლებს, დაჯარიმდებოდა. ეს ითვალისწინებდა ესპანურ კიბეზე ჯდომასაც, რაც 250-400 ევროთი ჯარიმდება.

2022 წლის ივნისში ამავე კიბის ელექტრონული სკუტერებით დაზიანებისთვის დაჯარიმდა ორი ამერიკელი ტურისტი.

იმავე წელს, ნაქირავები მანქანით ისევ ესპანურ კიბეზე მოძრაობისთვისა და კულტურული მემკვიდრეობის დაზიანებისთვის ჯარიმა მიიღო საუდის არაბეთის მოქალაქემ.