ლელო — ძლიერი საქართველოს ერთ-ერთი ლიდერი, მამუკა ხაზარაძე ქართული ოცნების დროებითი საგამოძიებო კომისიაზე მეორედ დაიბარეს. ხაზარაძეს გამოქვეყნებულ დოკუმენტში ვკითხულობთ, რომ ოპოზიციონერ ლიდერს "2012-2025 წლებში საქართველოს საგარეო პოლიტიკური მიზნების საზიანოდ განხორციელებული ქმედებებზე" ახსნა-განმარტების მიცემისთვის იბარებენ.

"გაცნობებთ, რომ კომისიის მიერ მოთხოვნილია თქვენ მიერ ახსნა-განმარტების მიცემა 2012-2025 წლებში საქართველოს საგარეო პოლიტიკური მიზნების საზიანოდ განხორციელებული ქმედებების შესახებ, რისთვისაც მოწვეული ბრძანდებით მიმდინარე წლის 30 ივნისს, 10:30-ზე" — ვკითხულობთ განცხადებაში.

შეგახსენებთ, მამუკა ხაზარაძეზე ამჟამად სისხლის სამართლის დევნა მიმდინარეობს. ხაზარაძე და ბადრი ჯაფარიძე ოცნების დროებით საგამოძიებო კომისიაზე შპს მაგნატის საქმის განხილვისთვის დაიბარეს. ბიზნესმენი ჯემალ ლეონიძე ავტოგასამართი სადგურების ქსელის, მაგნატის მესაკუთრე იყო. მედიაში გავრცელებული ინფორმაციით, ნაციონალური მოძრაობის ხელისუფლების დროს, ბიზნესმენს ქონება ჩამოართვეს და დააპატიმრეს. ლეონიძე ციხიდან პოლიტპატიმრის სტატუსით გამოვიდა და წართმეული ქონების დაბრუნებას ითხოვდა. ლეონიძე წინა ხელისუფლების მაღალჩინოსნებთან ერთად, ქონების წართმევაში მამუკა ხაზარაძეს ადანაშაულებდა.

ოპოზიციონერი ლიდერს კომისიაზე გამოუცხადებლობისთვის 50 000-ლარიანი გირაო დაეკისრა, რომელიც მან გადაიხადა. ცნობისთვის, გამოძიება სისხლის სამართლის კოდექსის 349-ე მუხლით მიმდინარეობს, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს. დანაშაული ისჯება ჯარიმით ან თავისუფლების აღკვეთით ვადით ერთ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.