პრეზიდენტის ადმინისტრაციის პრესსპიკერის განცხადებით, გიორგი მარგველაშვილი არასამთავრობო ორგანიზაციებს და არასაპალამენტო ოპოზიციას უახლოეს დღეებში შეხვდება და მათთან ერთად განიხილავს საარჩევნო კოდექსში რეკლამის განთავსების თაობაზე შესატან ცვლილებებს.

"გვინდა გამოვეხმაუროთ არასაპარლამენტო ოპოზიციისა და არასამთავრობო ორგანიზაციების სურვილს პრეზიდენტთან შეხვედრის შესახებ, საარჩევნო კოდექსში რეკლამის განთავსების თაობაზე შესატანი ცვლილებების განსახილველად. პრეზიდენტი აღნიშნულ ორგანიზაციებს უახლოეს დღეებში შეხვდება, სადაც ყველა საკითხი დეტალურად იქნება განხილული" - განაცხადა ეკა მიშველაძემ.

კანონპროექტი უფასო სარეკლამო დროის გადანაწილებაზე რესპუბლიკურ პარტიას ეკუთვნის, მისი მიხედვით აღნიშნული დრო უნდა გადანაწილდეს ყველა პარტიაზე და არა მხოლოდ მათზე, რომლებიც 4 პროცენტიან ბარიერს გადალახავენ.

არასაპარლამენტო ოპოზიცია მიიჩნევს, რომ კანონპროექტში ხარვეზებია და მისი მიღების შემთხვევაში პრეზიდენტმა მას ვეტო უნდა დაადოს.