რადიო თავისუფლების ევროპის ბიუროს რედაქტორმა რიკარდ იოზვიაკი X-ზე წერს, რომ NATO-მ დღეს 2024 წლის ყოველწლიური ანგარიში გამოაქვეყნა, მაგრამ 2023 წლის ანგარიშთან შედარებით იქ აღარაფერია ნათქვამი უკრაინისა და საქართველოს ალიანსში გაწევრიანებაზე.

"NATO-მ დღეს გამოაქვეყნა 2024 წლის ყოველწლიური ანგარიში.

რა აკლია 2023 წლის ანგარიშთან შედარებით?

"უკრაინის მომავალი NATO-შია და ალიანსი მხარს დაუჭერს უკრაინას მომავალი წევრობისკენ მიმავალ გზაზე".

"მოკავშირეები კვლავ ერთგულნი რჩებიან საქართველოს NATO-ში საბოლოო წევრობის მხარდაჭერის მიმართ", — წერს იოზვიაკი.

ანგარიშში საქართველოზე საუბარია ქვეთავში: "NATO-ს ჩართულობა სამხრეთ კავკასიაში". იქვე ვკითხულობთ, რომ "სამხრეთ კავკასიაში NATO-ს ჩართულობას კვლავ მხარს უჭერს NATO-ს სამეკავშირეო ოფისი თბილისში".

"NATO-მ და საქართველომ ასევე განაგრძეს პრაქტიკული თანამშრომლობა საქართველოს უსაფრთხოებისა და თავდაცვის შესაძლებლობების გასაძლიერებლად და ალიანსთან თავსებადობის გასაუმჯობესებლად. საქართველოს თავდაცვის ძალებმა მონაწილეობა მიიღეს ივნისში პოლონეთში გამართულ NATO-ს კოალიციის მეომრების თავსებადობის წვრთნებში (CWIX24), ხოლო საქართველოს სასაზღვრო პოლიციის წევრები ოპერაცია „ზღვის მცველის“ ფარგლებში 2024 წლის სექტემბერში განლაგდნენ, რაც საქართველოსთვის, როგორც ოპერატიული პარტნიორის, მეორე როტაციას წარმოადგენს.

სამხრეთ კავკასიაში NATO-ს ჩართულობას კვლავ მხარს უჭერს NATO-ს სამეკავშირეო ოფისი თბილისში", – წერია ანგარიშში.

"ორმხრივი და რეგიონული პარტნიორობის" ქვეთავში ნათქვამია, რომ

"NATO-ს გლობალური პარტნიორობის ქსელი 30 წელზე მეტია ვითარდება. ალიანსი თანამშრომლობს პარტნიორებთან ორმხრივად, ასევე რეგიონული პარტნიორობის ჩარჩოების მეშვეობით.

ევროატლანტიკურ სივრცეში მოკავშირეები აქტიურად არიან ჩართულნი 16 პარტნიორ ქვეყანასთან, ორმხრივად და ევროატლანტიკური პარტნიორობის საბჭოსა და „პარტნიორობა მშვიდობისთვის“ პროგრამის მეშვეობით. NATO-მ შეიმუშავა სპეციფიკური სტრუქტურები უკრაინასთან და საქართველოსთან ურთიერთობისთვის".

შეგახსენებთ, რომ აშშ-ს პრეზიდენტმა დონალდ ტრამპმა უკრაინაში ომის დაწყების მიზეზად, სწორედ უკრაინის NATO-ში გაწევრიანების მისწრაფება დაასახელა. რუსული მხარე კი აცხადებდა, რომ უკრაინაში კონფლიქტის მოსაგვარებლად, უკრაინამ უარი უნდა თქვას NATO-ში გაწევრიანებაზე.