ოცნების დეპუტატი, ირაკლი ქადაგიშვილი თანაინვესტირების ფონდის ყოფილი ხელმძღვანელის, გიორგი ბაჩიაშვილის მიერ ქვეყნის დატოვებას გამოეხმაურა.

მისი თქმით, იშვიათი გამონაკლისის გარდა, არცერთი სახელმწიფოს ტერიტორია არ არის მავთულხლართებით შემოფარგლული. "ამიტომ, ხვრელის მოყვარულმა შეიძლება, არქიფო სეთურივით კაბაგადაცმულმა ტყე-ტყე გადაირბინა მაგალითად, ოკუპირებულ ცხინვალში და იქიდან გაეშურა სადღაც, რუსეთში"

"არცერთი სახელმწიფოს ტერიტორია დღეს, იშვიათი გამონაკლისის გარდა, არ არის მავთულხლართებით და გადახნული ასე ვთქვათ, ზოლებით შემოფარგლული. ამიტომ, ხვრელის მოყვარულმა შეიძლება, არქიფო სეთურივით კაბაგადაცმულმა ტყე-ტყე გადაირბინა მაგალითად, ოკუპირებულ ცხინვალში და იქიდან გაეშურა სადღაც, რუსეთში.

ბაჩიაშვილმა, სწორად ახსნა თავისი ასე ვთქვათ, მდგომარეობა. ეს ადამიანი ზოგადად, როგორც ჩანს ხვრელებში მძრომიალეა და რომელიღაცა ამ ხვრელში გაძვრა," — განაცხადა ოცნების დეპუტატმა, ირაკლი ქადაგიშვილმა.

თანაინვესტირების ფონდის ყოფილმა ხელმძღვანელმა, გიორგი ბაჩიაშვილმა საქართველო გუშინ დატოვა. შსს-ს ინფორმაციით, მან ქვეყანა სომხეთის საზღვრის გავლით დატოვა.

ბაჩიაშვილს 2023 წლის ივლისიდან აკრძალული ჰქონდა ქვეყნის დატოვება და საქართველოს საზღვრის კვეთა, ასევე, ჩამორთმეული ჰქონდა საქართველოსა და რუსეთის მოქალაქის პასპორტები.

გიორგი ბაჩიაშვილს ორ საქმეზე აქვს ბრალი წაყენებული: "კრიპტოვალუტების მითვისების" საქმესა და "მტკვარი ჰესის" საქმეზე. ორივე შემთხვევაში ბიძინა ივანიშვილი ფიგურირებს.