NATO-ს გენერალურმა მდივანმა BBC-სთან კომენტარი გააკეთა 28 თებერვალს ვოლოდიმირ ზელენსკისა და დონალდ ტრამპს შორის მომხდარ შელაპარაკებაზე.

რუტეს თქმით, ის ინციდენტის შემდეგ ვოლოდიმირ ზელენსკის ორჯერ ესაუბრა და არ შეუძლია, საუბრის დეტალებზე ისაუბროს, თუმცა მისი თქმით, მოუწოდა უკრაინის პრეზიდენტს, რომ პატივი უნდა სცენ იმას, რაც ტრამპმა უკრაინისთვის ჯერჯერობით გააკეთა.

გენერალურმა მდივანმა განუცხადა BBC-ს, რომ "ზელენსკიმ უნდა იპოვოს გზა ტრამპთან ურთიერთობების აღდგენისთვის".

რუტემ დაამატა, რომ სწორედ ტრამპის პირველმა ადმინისტრაციამ, 2017-დან 2020 წლამდე უკრაინას "ჯაველინის" ანტისატანკო სისტემები მიაწოდა.

ინფორმაციისთვის, 28 თებერვალს, აშშ-ის პრეზიდენტ დონალდ ტრამპსა და ვოლოდიმირ ზელენსკის შორის შეხვედრა თეთრი სახლის "ოვალურ კაბინეტში" შედგა. შეხვედრას ესწრებოდა ამერიკის ვიცეპრეზიდენტი ჯეი დი ვენსიც, რომელიც დებატებში არაერთხელ ჩაერთო.

შეხვედრა, რომელსაც აშშ-სა და უკრაინას შორის იშვიათი მინერალების შეთანხმების ხელმოწერა უნდა მოჰყოლოდა, სკანდალურად დასრულდა, მას შემდეგ, რაც ვოლოდიმირ ზელენსკიმ აშშ-ის პრეზიდენტთან და ჯეი დი ვენსთან ცხარედ იკამათა და თეთრი სახლი კომენტარის გარეშე დატოვა. აშშ-ის ვიცე პრეზიდენტმა ვოლოდიმირ ზელენსკის მადლიერების არ გამოხატვაში დასდო ბრალი, ხოლო დონალდ ტრამპმა კი უკრაინის პრეზიდენტი ომის გაგრძელების სურვილში დაადანაშაულა.

შეხვედრის შემდეგ თეთრმა სახლმა გაავრცელა ინფორმაცია, რომ ტრამპისა და ზელენსკის პრესკონფერენცია გადაიდო და "მინერალების შეთანხმებას" აშშ-სა და უკრაინას შორის ხელი არ მოეწერა.