ანა ვინტურის კარიერისტობასა და დაუნდობლობაზე ამდენი ხუმრობის შემდეგ, ამერიკული Vogue-ს მთავარი რედაქტორი მართლა ემსგავსება ეშმაკს აცვია პრადას პერსონაჟს, მირანდა პრისტლის — როგორც ჩანს, ვინტური მუშაობის შეწყვეტას ჯერ კიდევ დიდი ხანი არ აპირებს.

მსოფლიოს ყველაზე გავლენიანი მოდის ჟურნალის რედაქტორმა, რომელიც ამ პოზიციას 1988 წლიდან იკავებს, მოდაში შეტანილი წვლილის გამო ბრიტანეთის ღირსების ორდენი მიიღო.

მან დიდი ბრიტანეთის სამეფოს ერთ-ერთი ყველაზე საპატიო ჯილდო მეფე ჩარლზის დაბადების დღისთვის დაგეგმილი ღონისძიების ფარგლებში მიიღო. ამ ორდენის მფლობელები არიან ჯუდი დენჩი, დევიდ ჰოკნი და სერ პოლ მაკარტნი.

ფოტო: PA Media

ჯილდოს გადაცემის ცერემონია ბუკინგემის სასახლეში სამშაბათს შედგა. ანა ვინტურს საკულტო ბრიტანელი დიზაინერის, Alexander McQueen-ის ლუქი ჰქონდა მორგებული, თავის განუყრელ შავ მზის სათვალესთან ერთად. მოდის გიგანტმა ჟურნალისტებს განუცხადა, რომ ეს ჯილდო მისთვის "სრულიად მოულოდნელი" და გასახარი იყო.

აღსანიშნავია, რომ 2017 წელს დედოფალმა ელიზაბეთ მეორემ ჟურნალისტიკასა და მოდაში შეტანილი წვლილისთვის ანა ვინტურს დეიმის წოდება მიანიჭა, რაც რაინდის წოდების ეკვივალენტურია ქალებისათვის.

"აქ ბოლოს რომ ვიყავი, დედოფალმა მედალი გადმომცა და ორივე შევთანხმდით, რომ ჩვენ-ჩვენს საქმეს ძალიან დიდი ხნის განმავლობაში ვასრულებდით. ამ დილას კი მეფე ჩარლზმა მკითხა, ღირსების ორდენის მიღების შემდეგ თუ შევწყვეტდი მუშაობას. მე უარი მკაცრად ვუთხარი," — განაცხადა ვინტურმა.