რუსეთის საგარეო უწყების განცხადებით, სირიის ახალ დე ფაქტო ლიდერთან "გულწრფელი" მოლაპარაკებები გაიმართა სირიაში არსებული 2 სამხედრო ბაზის შენარჩუნებასთან დაკავშირებით, თუმცა რა შედეგამდე მივიდა პროცესი, უცნობია.

საინფორმაციო სააგენტო Reuters წყაროზე დაყრდნობით წერს, რომ აჰმედ ალ-შარამ რუსეთს ბაშარ ალ-ასადის გადაცემა მოსთხოვა — ყოფილი დიქტატორი დეკემბერში აჯანყებულებს სწორედ რუსეთში გაექცა.

სირიული ახალი ამბების სააგენტო Sana-ს განცხადებით, დამასკომ რუსეთს, რომელიც სამოქალაქო ომში ასადს უჭერდა მხარს, მოსთხოვა კონკრეტული ნაბიჯების გადადგმა, რაც გამოიხატება კომპენსაციებსა და ქვეყნის რეკონსტრუქციაში.

კითხვას იმასთან დაკავშირებით, მოსთხოვა თუ არა სირიის ახალმა მმართველმა ძალამ რუსეთს კომპენსაციის გადახდა და ასადის გადაცემა, კრემლის პრესსპიკერმა, დიმიტრი პესკოვმა პასუხი არ გასცა.

რუსეთის ფედერაცია ჯარისკაცებითა და ავიაციით ასადს წლების განმავლობაში ეხმარებოდა სირიელი აჯანყებულების წინააღმდეგ ბრძოლაში — ამჯერად პუტინს ტარტუსის საზღვაო ბაზისა და ხმეიმიმის საავიაციო ბაზის შენარჩუნება სურს, რადგან მათი დაკარგვა დიდი დარტყმა იქნება ახლო აღმოსავლეთის რეგიონზე კონტროლის მიზნისათვის.

სირიის ახალმა ადმინისტრაციამ რუსეთის დელეგაციასთან შეხვედრის შემდეგ განაცხადა, რომ ხაზი გაესვა ფაქტს იმასთან დაკავშირებით, რომ ურთიერთობების აღდგენა უნდა დაეფუძნოს წარსული შეცდომების გამოსწორებას, სირიელი ხალხის სურვილის პატივისცემასა და მათი ინტერესების გათვალისწინებას. მიუხედავად ამისა, Reuters-ის ინფორმაციით, შეთანხმების მიღწევა ჯერჯერობით ვერ მოხერხდა.