რადიო თავისუფლების ევროპის ბიუროს რედაქტორის, რიკარდ იოზვიაკის განცხადებით, ევროკავშირი საქართველოში გაცემული დიპლომატიური პასპორტებისთვის უვიზო რეჟიმის შეჩერებას განიხილავს.

დიპლომატიურ პასპორტს საქართველოს მთავრობა გასცემს და ის ხელისუფლების სხვადასხვა შტოს წარმომადგენლებსა და მათ ოჯახის წევრებს გადაეცემათ.

რიკარდ იოზვიაკის ინფორმაციით, დიპლომატიური პასპორტებისთვის უვიზო რეჟიმის შეჩერებას არ სჭირდება ევროკავშირის წევრი ყველა ქვეყნის თანხმობა, საჭიროა მხოლოდ უბრალო უმრავლესობა, რაც იმას ნიშნავს, რომ ქართული ოცნების მოკავშირე უნგრეთი და სლოვაკეთი მას ვერ დაბლოკავენ.

მიუხედავად ამისა, ამ სიაში მოხვედრილ პირებს შეეძლებათ უვიზო რეჟიმით სტანდარტული ბიომეტრიული პასპორტის საშუალებით ისარგებლონ. შესაბამისად, რიკარდ იოზვიაკის თქმით, ეს სიმბოლური ნაბიჯი უფრო იქნება.

ინფორმაცია საქართველოში ევროკავშირის ელჩმა, პაველ ჰერჩინსკიმაც დაადასტურა. ევროკავშირის საგარეო საქმეთა მინისტრები საქართველოს საკითხზე 16 დეკემბერს იმსჯელებენ. მომავალი კვირის ბოლოს კი საქართველოს საკითხი ევროკავშირის სახელმწიფოთა და მთავრობათა მეთაურების დონეზე განიხილება.