ანონიმური მიმოწერის აპლიკაცია Sarahah, როგორც აღმოჩნდა, მთლად ანონიმურიც არ არის. პოპულარული სერვისი, რომელიც ანონიმური მესიჯების მიღებისა და გაგზავნის საშუალებას გაძლევთ, სმარტფონის აპლიკაციის საშუალებით, თქვენი ტელეფონიდან კონტაქტების სიას იღებს და საკუთარ სერვერზე აგზავნის.

ეს პროცესი პირველად კიბერუსაფრთხოების სპეციალისტმა ზაქარი ჯულიანმა დააფიქსირა.

სარჰაჰი ამ ინფორმაციაზე წვდომას ღიად ითხოვს. აპის ტელეფონზე ინსტალაციის დროს, ის თქვენს კონტაქტებზე წვდომის ნებართვას გთხოვთ. თუმცა, თუ აპს კონტაქტების აღებაზე უარს ეტყვით, მისი გამოყენება მაინც შეგეძლებათ.

სარაჰაჰის შემქმნელი ზაინ ალ-აბიდინ ტავფიკი აცხადებს, რომ აღნიშნული ინფორმაცია ახალი ფუნქციის, "იპოვე მეგობრების" დასამატებლად გახდა საჭირო. მისი თქმით, ფუნქციის ჩაშვება ტექნიკური მიზეზების გამო გადაიდო. სერვისის შემქმნელები ირწმუნებიან, რომ ეს მომხმარებლის ანონიმურობას არ დაარღვევს.

მას შემდეგ, რაც კონტაქტების ტელეფონიდან სერვერებზე გაგზავნის ინფორმაცია მედიაში გავრცელდა, სერვისის შემქმნელმა ტვიტერზე დაწერა, რომ ეს ფუნქცია აპლიკაციის მომდევნო ვერსიიდან გაითიშებოდა. "ამჟამად, ჩვენი სერვერები გაგზავნილ კონტაქტებს არ ინახავენ" — დაამატა მან.

უსაფრთხოების დარღვევა თუ სპამერობა?

აპლიკაციების მიერ კონტაქტების სიაზე წვდომა სიახლე არ არის და ამ ინფორმაციას უამრავი აპი ითხოვს, თუმცა, როგორც წესი, მონაცემებს მომხმარებლის სასარგებლოდ იყენებენ. სარაჰაჰის შემთხვევაში "განგაშის" მიზეზი ის გახდა, რომ დღევანდელი ვერსიით, აპლიკაცია კონტაქტებს მომხმარებლისთვის ხილული არცერთი ფუნქციისთვის არ იყენებდა.

სარაჰაჰის ვებ-ვერსია მომხმარებლებისგან მინიმალურ ინფორმაციას იღებს და შესაბამისად, აქ ყველაფერი რიგზეა. რეალურად, არც აპის მიერ კონტაქტების აღება ნიშნავს, რომ ანონიმური მესიჯის გამგზავნის ვინაობა გამჟღავნდება. თუმცა, ბევრი მომხმარებლისთვის, ეს მაინც არასასიამოვნო ფაქტია.

გარდა ანონიმურობის დარღვევისა, რიგ შემთხვევებში, ასეთ მონაცემებს დიდ კომპანიებზე ჰყიდიან, რომლებიც შემდგომ მათ სარეკლამო კამპანიებისთვის ან მონაცემთა ანალიზისთვის იყენებენ.

მსგავსი ფაქტი დაფიქსირდა რამდენიმე თვის წინ, როდესაც გამჟღავნდა, რომ პოპულარულმა სერვისმა Unroll.me მომხმარებელთა პირადი მონაცემები ტაქსის კომპანია Uber-ს მიჰყიდა. მიუხედავად იმისა, რომ როგორც წესი, ასეთი ქმედებები სერვისის სამომხმარებლო პირობებშია აღწერილი, მომხმარებელთა სრული უმრავლესობა უზარმაზარ ტექსტებს არ კითხულობს და სერვისის მომწოდებლის კეთილსინდისიერებას ბრმად ენდობა.

სარაჰაჰის შემქმნელი ირწმუნება, რომ კომპანია მომხმარებლის მონაცემებს არაფერს უპირებს. მიუხედავად ამისა, მომხმარებლის ტელეფონიდან აპლიკაციის სერვერებზე არცერთი ფუნქციისთვის საჭირო მონაცემების გაგზავნა, მიუღებელი ფაქტია.