რუსეთის მოქალაქეები ოკუპირებულ აფხაზეთში დაჯავშნილ ტურებს აუქმებენ. ამის შესახებ რუსეთის ტუროპერატორების ასოციაციაზე დაყრდნობით ამის შესახებ bm.ge წერს.

ასოციაციის ინფორმაციით, ზაფხულის სეზონისთვის ტურისტული ვიზიტების დაჯავშნა უკვე დაწყებული იყო. საუბარია 100 ათას ჯავშანზე. როგორც ასოციაციაში აღნიშნავენ, აფხაზეთში მიმდინარე პროცესების გამო, მათმა დიდმა ნაწილმა ჯავშნების გაუქმება დაიწყო.

11 ნოემბერს, სოხუმში დაწყებული პროტესტის ფონზე, რუსეთის საგარეო საქმეთა სამინისტრომ რუსეთის მოქალაქეებს მოუწოდა, ოკუპირებულ აფხაზეთში მგზავრობისგან თავი შეიკავონ. აფხაზეთში დარჩენილ რუსებს კი ურჩია, სიფრთხილე გამოიჩინონ.

შეგახსენებთ, რომ 11 ნოემბრის ღამეს ოკუპირებულ აფხაზეთში 5 ოპოზიციონერი დეპუტატი დააკავეს. როგორც დაკავებული ოპოზიციონერების მხარდამჭერები აცხადებდნენ, დაკავებების მიზეზი ის გახდა, რომ ოპოზიციონერები რუსულ-აფხაზური "საინვესტიციო ხელშეკრულების" რატიფიცირებას ეწინააღმდეგებოდნენ, რომლის რატიფიცირებასაც ოკუპირებული აფხაზეთის დე ფაქტო პარლამენტი 15 ნოემბერს გეგმავდა.

დაკავებულები პროტესტის ფონზე 12 ნოემბერს გაათავისუფლეს. 15 ნოემბერს კი ე.წ. პარლამენტში სადავო კანონპროექტის მიღება საპროტესტო ტალღის ზრდის გამო ვერ მოხერხდა. ოკუპირებულმა აფხაზეთმა კანონპროექტი უკან გაიწვია.

ამავე თემაზე: