შვედი კლიმატის აქტივისტი, გრეტა თუნბერგი მოქალაქეებს მოუწოდებს, რომ 11 ნოემბერს, 19:00 საათზე თავისუფლების მოედანზე (პუშკინის პარკი) შეიკრიბონ. ამის შესახებ ის სოციალურ ქსელ X-ში წერს.

"გავერთიანდეთ ავტორიტარიზმისა, ექსპლუატაციის, გრინვოშინგის, ომისა და კაპიტალისტური ექსპლუატაციის წინააღმდეგ!“, — წერს აქტივისტი პლატფორმა X-ზე.

თავის ტექსტში აქტივისტი ძირითად აქცენტს აზერბაიჯანზე და ბაქოში დაგეგმილ გაეროს კლიმატის კონფერენციაზე (COP29) აკეთებს, რომელიც 11 ნოემბერს გაიხსნება, თუმცა ამბობს, რომ "ავტორიტარული ტენდენცია რეგიონის მასშტაბით იზოლირებული არაა — ივანიშვილის, პუტინის, ერდოღანის და ირანის თეოკრატიული რეჟიმები აძლიერებენ კონტროლს და ავიწროებენ მათ, ვინც განსხვავებულად ფიქრობს".

"შემოგვიერთდით აქციაზე, რომლითაც გავერთიანდებით ავტორიტარიზმისა და ექსპლუატაციის ტალღის წინააღმდეგ, რომელიც ვრცელდება კავკასიის რეგიონში. აზერბაიჯანი, რომელიც COP29-ს ფასადად იყენებს, აძლიერებს კონტროლს ყალბი "მწვანე" დღისწესრიგით, ამკაცრებს ძალაუფლებას და ესკალაციას უწევს რეგიონულ დაძაბულობას.

20 წელზე მეტი ხნის განმავლობაში, აზერბაიჯანში ალიევის რეჟიმს ხალხი ჰყავდა დაჩაგრული, ხელს უწყობდა სიღარიბეს, შიშს და დუმილს. ეს ავტორიტარული ტენდენცია არ არის იზოლირებული რეგიონის მასშტაბით — ივანიშვილის, პუტინის, ერდოღანის, ირანის თეოკრატიული რეჟიმები აძლიერებენ კონტროლს, ავიწროებენ მათ ვინც განსხვავებულად ფიქრობს, ომსა და ეთნიკურ წმენდას იყენებენ სომხების, უკრაინელების, ქურთების და სხვა ეთნიკურ უმცირესობებს წინააღმდეგ, რომ გაამართონ თავიანთი სასტიკი პოლიტიკა.

მათზე, ვინც ხმამაღლა საუბრობენ — ჟურნალისტებზე, აქტივისტებსა და მეცნიერებზე, ხშირია ძალადობა და მათ ხშირად აპატიმრებენ. ამ სისტემის მიხედვით, კლიმატისადმი ქმედებები დაყვანილია კორპორაციული მოგების სქემებამდე, რის გამოც ხალხის საჭიროებები იგნორირებულია და საზოგადოებები განადგურებული.

კავკასიის ფემინისტური ანტი-ომის მოძრაობა ითხოვს მომავალს, რომელიც თავისუფალი იქნება ავტორიტარიზმის, ომისა და კაპიტალისტური სიხარბისგან. ჩვენ მხარს ვუჭერთ ნამდვილ თავისუფლებას, თანასწორობას, სამართლიანობას და რეგიონს, სადაც ხალხი პირველ ადგილზეა და არა მოგება, — წერს შვედი აქტივისტი.

ცნობილი შვედი აქტივისტი თბილისში 4 ნოემბერს ჩამოვიდა. ის რუსთაველის გამზირზე საპროტესტო აქციაზეც გამოჩნდა. ჟურნალისტის კითხვაზე, ეკოლოგიასთან და კლიმატთან დაკავშირებული პრობლემების გასაპროტესტებლად ჩამოვიდა, თუ პოლიტიკით დაინტერესდა, აქტივისტმა უპასუხა, რომ ეს პრობლემები ერთმანეთთანაა კავშირში და მისთვის ერთი და იგივეა.

თუ გაინტერესებს მსოფლიოში მიმდინარე მნიშვნელოვანი ამბები, გაწევრიანდით ჯგუფში — რა ხდება მსოფლიოში