ანა კენდრიკი კიდევ ერთხელ საუბრობს ღიად, რატომ გადაწყვიტა, შვილები არ ჰყოლოდა. ოსკარის ნომინანტ ამერიკელ მსახიობს საკუთარი არჩევანის მოტივი აქამდეც აუხსნია; დედობა საჩემო არ არისო, წერდა კენდრიკი 2016 წელს გამოცემულ ავტობიოგრაფიულ წიგნში Scrappy Little Nobody.

ამჯერად, მსახიობი საკითხს კიდევ ერთხელ დაუბრუნდა ამერიკულ ვებგამოცემა Flow Space-თან ინტერვიუში. კენდრიკმა ხაზი გაუსვა, როგორი განსხვავებულია შვილების ყოლისადმი ქალებისა და კაცების პერსპექტივა.

"ამასწინათ ვფიქრობდი ფრაზაზე, რომელიც ხშირად გამიგია კაცებისგან, როცა ისინი მომავალში შვილების ყოლის სურვილზე საუბრობენ ხოლმე", — ჰყვება კენდრიკი, — "ჩემთვის გავიფიქრე, ქალისგან მსგავსი ნათქვამი არასდროს მსმენია-მეთქი. და აი, რას ამბობენ ხოლმე: ჰო, ერთ დღესაც... სახლში ბავშვები ირბენენო. არასდროს გამიგია, ეს ქალს ეთქვას. რადგან სულ სხვაგვარი სურათია, არა?".

მსახიობი თავადვე განმარტავს, რას გულისხმობს "სხვაგვარ სურათში".

"აი, შინ რომ ბრუნდები სამუშაო დღის ბოლოს, პორტფელს დადებ და კოქტეილს გაიკეთებ, ლორა ეშლის კაბაში გამოწყობილი ქალი კი ეზოში დგას და იქვე თეთრით შემოსილი ბავშვები დარბიან", — ჰყვება კენდრიკი და რიტორიკული შეკითხვით აგრძელებს, — "და თქვენ სად ხართ ამ სურათში, ბატონო?".

მსახიობი ამბობს, ეს ფრაზა ყოველთვის უსიამოვნოდ მხვდება ხოლმე ყურშიო. მისი აზრით, ეს ოჯახში მოვალეობების არათანაბრად განაწილების პრაქტიკასაც უსვამს ხაზს.

"დაახლოებით ის ამბავია, ქმრები რომ ამბობენ ხოლმე, ბავშვების გაზრდაში დახმარება გვსურსო. მაშინ, როცა ორივე მშობელი მუშაობს".

ინტერვიუში კენდრიკმა ასევე აღნიშნა, რომ ხშირად სურს, თავისი მოსაზრებები იმ მეგობრებს გაუზიაროს, რომლებიც დედები არიან, მაგრამ საუბარში ჩართვამდე ყოყმანობს.

"ყოველთვის მინდა, რაღაც ვთქვა, მაგრამ მერე ჩემთვის ვიტყვი ხოლმე, უშვილო, კატების მოყვარული ქალი ვარ-მეთქი და გავჩერდები".

მსახიობმა ისიც აღნიშნა, რომ კატა მართლაც აიყვანა, რამაც საკუთარი გადაწყვეტილების სისწორეში კიდევ ერთხელ დაარწმუნა. ბავშვს ვინ მანდობს-მეთქი, ვფიქრობ ხოლმეო, ამბობს კენდრიკი.

"უშვილო, კატების მოყვარული ქალი"

ფოტო: Sky TV

"უშვილო, კატების მოყვარულ ქალზე" ხაზგასმით ანა კენდრიკი ასევე გამოეხმაურა აშშ-ის ვიცეპრეზიდენტობის რესპუბლიკელი კანდიდატის, ჯეიდი ვენსის, რამდენიმე წლის წინ გაკეთებულ სექსისტურ კომენტარს, ამერიკას უშვილო, კატების მოყვარული ქალები მართავენ, რომლებსაც ცხოვრებაში არ გაუმართლათ და ახლა სურთ, ქვეყანამაც იგივე ბედი გაიზიაროსო. ამ განცხადების საპასუხოდ, როცა პოპვარსკვლავმა ტეილორ სვიფტმა აშშ-ის საპრეზიდენტო არჩევნებში კამალა ჰარისს გამოუცხადა მხარდაჭერა, განცხადებას ხელი სწორედ "უშვილო, კატების მოყვარული ქალის" სახელით მოაწერა.

"უშვილო, კატების მოყვარული ქალების" სურათის დახატვა კი პატრიარქალური კულტურისთვის არახალია. შუა საუკუნეებში, მძვინვარე ქალთმოძულეობის ეპოქაში, კატები, ქალების მსგავსად, ბნელს ძალებს დაუკავშირეს: თითქოს, "კუდიანებად" შერაცხილ ქალებს კატებად გადაქცევა შეეძლოთ. ამ ცრურწმენის განმტკიცებას კათოლიკე ეკლესიამაც შეუწყო ხელი და როცა პაპმა გრიგოლ IX-მ შავი კატები ეშმაკთან კავშირში დაადანაშაულა, ევროპაში მასშტაბურად დაიწყეს ამ ცხოველების ხოცვა. აღსანიშნავია, რომ "კუდიანობაში" დადანაშაულებულ ადამიანებში ასევე ჭარბობდნენ ის ქალები, რომლებიც თავიანთი ცხოვრების სტილით დამკვიდრებულ სოციალურ ნორმებს ეწინააღმდეგებოდნენ, მაგალითად, არ ჰყავდათ შვილი. ამდენად, ჯეიდი ვენსის თუ ილონ მასკის სექსისტური მსოფლმხედველობა სწორედ უძველესი მიზოგინიური წარმოდგენებით და პატრიარქალური კულტურითაა ნასაზრდოები.