რუსეთის ფედერაციაში მინისტრთა კაბინეტმა მხარი დაუჭირა კანონპროექტს, რომელიც კრძალავს შვილის არყოლის პროპაგანდას. ამის შესახებ ინფორმაციას რუსული სამთავრობო მედია TASS წერს.

რუსეთის ფედერაციის მთავრობამ, მხარი დაუჭირა კანონპროექტს, რომელიც კრძალავს შვილის არყოლის პროპაგანდას მედიაში, ინტერნეტში, ფილმებსა და რეკლამებში.

კანონპროექტი სახელმწიფო დუმის განათლების კომიტეტის წევრმა ელვირა აიტკულოვამ (პარტია ედინაია რასია) შეიმუშავა. რუსული მედია წერს, რომ ინიციატივა მიზნად ისახავს ტრადიციული ოჯახური ღირებულებების შენარჩუნებას და განმტკიცებას. რუსული პრესა წერს, რომ აღნიშნული კანონი, რუსეთში უკვე მიღებული ანტი-ლგბტ კანონის ჯარიმების ანალოგიურ სადამსჯელო ღონისძიებებს ითვალისწინებს, სადაც სპეციალური ადმინისტრაციული ჯარიმებია დაწესებული არატრადიციული სექსუალური ურთიერთობებისა და სქესის შეცვლის პროპაგანდისთვის.

ისევ TASS-ის ცნობით, რუსეთში მოქმედი კანონმდებლობის თანახმად, არატრადიციული სექსუალური ურთიერთობების პროპაგანდისა და ასევე სქესის შეცვლისთვის, ჯარიმა 50-დან 100 ათას რუბლამდეა (საშუალოდ 1500-დან 3 ათასი ლარი); თანამდებობის პირებისთვის — 100-დან 200 ათას რუბლამდე (საშუალოდ 3 ათასიდან 6 ათას ლარამდე); იურიდიული პირებისთვის — 800 ათასიდან 1 მილიონ რუბლამდე (საშუალოდ 24 ათასიდან 30 ათასამდე) ან საქმიანობის შეჩერება 90 დღემდე.