დღეს, 20 ივლისს, ორთაჭალჰესზე მიმდინარე სარემონტო სამუშაოების გამო მდინარე მტკვრის დონემ დაიწია, რის შემდეგაც მდინარეს განსაკუთრებით ცუდი სუნი ასდის. რატომ ასდის მტკვარს სუნი? - ამ კითხვაზე პასუხი On.ge-მ ვერც ერთი სახელმწიფო უწყებიდან ვერ მიიღო.

თბილისის მერიაში გვითხრეს, რომ საკითხი გარემოს დაცვის სამინისტროსთან უნდა გაგვერკვია. თავის მხრივს სამინისტროს პრესსამსახურმა განმარტა, რომ გარემოს დაცვის სამინისტრო არ არის დასუფთავების სამსახური:

"ეს არის გარემოს დაცვის პოლიტიკის განსაზღვრელი უწყება. თვითმმართველობებმა უნდა გააკეთონ ეს ყველაფერი", - ამბობენ სამინისტროში.

On.ge დაუკავშირდა გარემოს ეროვნულ სააგენტოსაც, რომელმაც სუნის მიზეზის გასარკვევად, ორთაჭალჰესის მფლობელ კომპანიასთან, ენერგო პრო ჯორჯიასთან გადაგვამისამართა.

19 ივლისს, კომპანიამ გაავრცელა განცხადება, სადაც იუწყებოდა, რომ ორთაჭალჰესზე გადაუდებელი სამუშაოების გამო, ერთი დღით, ჰესი გაჩერდება და მდინარე მტკვრის კალაპოტში წლის დონე დაიწევს.

ამასთან, აღნიშნულ კომპანიაში ამბობენ, რომ ჰესზე მიმდინარე ტექნიკური სამუშაოები სუნთან არაფერ შუაშია, შესაბამისად, არ იციან, რატომ ასდის მტკვარს სუნი.

ამის შემდეგ On.ge კიდევ ერთხელ დაუკავშირდა თბილისის მერიას და სთხოვა გაერკვია მიზეზი, ან მოეცა საკონტაქტო ინფორმაცია იმ უწყებისა თუ ადამიანის, ვისაც აქვს პასუხი კითხვაზე - რატომ ასდის მტკვარს ცუდი სუნი. მერიისგან პასუხი აქამდე არ მიგვიღია.

7 ივლისს, ძლიერი წვიმების შემდეგ, მტკვარმა თბილისის ტერიტორიაზე დიდი ოდენობით ნაგავი ჩამოიტანა, თუმცა მდინარის დასუფთავებაზე პასუხისმგებლობა მაშინაც არც ერთმა უწყებამ არ აიღო.