მოკლედ: ქართულმა ოცნებამ მიიღო გადაწყვეტილება, მოამზადოს კანონპროექტი, რომელიც საზოგადოებას "ფსევდოლიბერალური იდეოლოგიისგან და მისი გარდაუვალი მავნე შედეგებისგან დაიცავს".

  • ამის შესახებ დღეს, 29 თებერვალს, ქართული ოცნების აღმასრულებელმა მდივანმა მამუკა მდინარაძემ განაცხადა.

დეტალები: მამუკა მდინარაძის თქმით, კანონპროექტი უახლოესი 2 კვირის განმავლობაში მომზადდება და დაინიციირდება პარლამენტში.

  • "არატრადიციული ცხოვრების წესის მიზანმიმართული პროპაგანდა არის ის, რასთან დაპირისპირებაც არის ჩვენი პასუხისმგებლობა ქართული საზოგადოების და მისი მომავლის წინაშე", — განაცხადა მდინარაძემ.
  • მისივე თქმით, ყველა, "ვინც ამ ღირებულებების წინაშე პასუხისმგებლობას გრძნობს", ვალდებულია ჩაერთოს კანონპროექტის შექმნაში და მხარი დაუჭიროს მას.
  • ასევე, მდინარაძემ აღნიშნა, რომ ქართული ოცნების "მონაპოვარია" ადამიანის, მათ შორის, არატრადიციული ორიენტაციის მქონე ადამიანების უფლებების დაცვა.
  • "სწორედ ჩვენმა ხელისუფლებამ აღმოფხვრა ასეთ ადამიანებზე ზეწოლის, მათი შანტაჟის, პირადი ცხოვრების ხელყოფის უხეში პრაქტიკა, რომელიც წინა ხელისუფლების გამორჩეული ხელწერა იყო", — განაცხადა მდინარაძემ და აღნიშნა, რომ
  • "ქართული საზოგადოება ყოველთვის იყო ტოლერანტული, თუმცა, ქართული საზოგადოება არ არის და ვერ იქნება ტოლერანტული ფსევდოლიბერალური პროპაგანდის მიმართ".

გარდა ამისა, მამუკა მდინარაძემ განაცხადა, რომ საქართველოში 2017 წელს ქართულმა ოცნებამ ერთნაირსქესიანთა ქორწინების დაკანონება შეზღუდა და საქართველოს კონსტიტუციაში ჩაიწერა, რომ "ქორწინება, ეს არის ქალისა და მამაკაცის კავშირი ოჯახის შექმნის მიზნით".

  • "ამის მიუხედავად, შეიძლება აღმოვჩნდეთ რეალობის წინაშე, როდესაც მოგვთხოვენ ე.წ. "სამოქალაქო პარტნიორობის" დაკანონებას", — აღნიშნა მდინარაძემ. მისი თქმით, დღეს, მსოფლიოში "ფსევდოლიბერალები ილაშქრებენ" ისეთი ტერმინების წინააღმდეგ, როგორიცაა დედა და მამა, ცოლი და ქმარი. "ითხოვენ ე.წ. "გენდერულად ნეიტრალური" ტერმინოლოგიის დანერგვას, როგორიცაა მშობელი 1 და მშობელი 2 და ა.შ".
  • მდინარაძის თქმით, "ფსევდოლიბერალები" საქართველოში ყოველწლიურად ცდილობენ "თავს მოგვახვიონ ე.წ."პრაიდი" მაშინ, როდესაც სოციოლოგიური კვლევები ადასტურებს, რომ საქართველოს მოსახლეობის 90 პროცენტზე მეტი ამას, სრულიად სამართლიანად, პროპაგანდად აღიქვამს და ე.წ. "პრაიდის" ჩატარების წინააღმდეგია".

ბოლო ხაზი: "ჰომოსექსუალობის ამკრძალავი" კანონი რუსეთში 2013 წელს შევიდა ძალაში. ეს კანონი 18 წლამდე ასაკის ადამიანებში "ჰომოსექსუალობის აგიტაციას" კრძალავს.

  • რუსეთის მთავრობა აცხადებდა, რომ აღნიშნული კანონით "მორალს" იცავს, თუმცა, 2017 წელს ევროსასამართლომ განაცხადა, რომ ეს კანონი აძლიერებს სტიგმას, წინასწარგანწყობასა და ახალისებს ჰომოფობიას.
  • რუსეთში ჰომოსექსუალობა 1993 წლიდან არის დეკრიმინალიზებული, თუმცა, კრემლის პოლიტიკის შედეგად, ქვეყანაში ანტი-ლგბტ განწყობები მაინც მაღალია.
  • რუსეთის უზენაესმა სასამართლომ, 2023 წლის 30 ნოემბრის გადაწყვეტილებით, საერთაშორისო ლგბტქია+ უფლებადამცველი მოძრაობები "ექსტრემისტულ" ორგანიზაციებად ცნო.

მსგავსი: ხელისუფლების მორიგი კამპანია ჰომოფობიური რიტორიკით, ლევან აკინის ფილმი და ანა ხაზარაძის კომპანია — რა ხდება