წლევანდელ გრემის დაჯილდოებაზე ლეგენდარული სელინ დიონი მივიდა. საღამოს მთავარი ჯილდო წლის საუკეთესო ალბომი ტეილორ სვიფტს სწორედ მან გადასცა.

ცნობილმა კანადელმა მომღერალმა 2022 წელს განაცხადა, რომ გაშეშებული ადამიანის სინდრომი (Stiff Person Syndrome) დაუდგინდა. ეს იშვიათი ნევროლოგიური დაავადება თანდათან პროგრესირებს და იწვევს ტკივილს, კრუნჩხვებს და კუნთოვან გაშეშებას. სწორედ ამ მიზეზით დიონის დაჯილდოებაზე მისვლას გულშემატკივრები არ ელოდნენ.

"როცა ვამბობ, რომ აქ თქვენთან ერთად ყოფნით ბედნიერი ვარ, ამას მართლა ვგულისხმობ. გრემის დაჯილდოება უზომო სიყვარულისა და სიხარულის გაზიარებაა, რომელიც მუსიკას ადამიანებისთვის მოაქვს და უნდა დავაფასოთ, რომ ამ საღამოზე დასწრების პატივი გვერგო", — აღნიშნა სელინმა სცენიდან.

შარშანდელ განცხადებაში მომღერალმა თქვა, რომ კრუნჩხვები ყოველდღიურობაში ბევრ სირთულეს უქმნიდა, უძნელდებოდა სიარული და უწინდებურად სიმღერაც კი. შესაბამისად, გაუქმდა წელს დაგეგმილი ევროპული ტურნე.

სელინის თქმით, სურდა, ამ დაავადებასთან ერთად ცხოვრების პერიოდი გადაეღო და საზოგადოებისთვის გაეზიარებინა, რათა მსგავსი დიაგნოზის მქონე სხვა ადამიანებს დახმარებოდა.

სინდრომი, რომელიც პირველად 1950-იან წლებში აღიწერა, მილიონში ერთ ადამიანს ემართება. ამის გამო, დაავადებაზე სათანადო სამეცნიერო-კვლევითი სამუშაოები არაა ჩატარებული.

55 წლის სელინ დიონი თანამედროვეობის ერთ-ერთ საუკეთესო ვოკალისტად მიიჩნევა. მუსიკოსის კარიერა მან 1980-იან წლებში დაიწყო, საყოველთაო აღიარება კი მან 1988 წელს მოიპოვა, როცა შვეიცარია წარადგინა ევროვიზიაზე და გაიმარჯვა.

დიონი ერთ-ერთი ყველაზე პოპულარული მომღერალიცაა — მსოფლიოში მისი ჩანაწერების 200 მილიონზე მეტი ეგზემპლარია გაყიდული. ამასთან, ჩანაწერების გაყიდვის მაჩვენებლით, იგი ყველა დროის ყველაზე პოპულარულ კანადელ და ფრანგულენოვან შემსრულებლადაც მიიჩნევა.