ჯერ სულ რაღაც ორი კვირაა, რაც 2024 წელი დაიწყო, მაგრამ პოპკულტურაში უკვე უამრავი სიახლეა. მაგალითად, წინა კვირაში გავიგეთ ერთ-ერთი ყველაზე პრესტიჟული კინოდაჯილდოების, ოქროს გლობუსის, გამარჯვებულების ვინაობა. ვნახეთ წელს გამოსაშვები რამდენიმე ფილმისა და სერიალის ტრეილერი. ჰო, მართლა, არიანა გრანდეც დაუბრუნდა კარიერას. მოკლედ, რამე რომ არ გამოგვრჩეს, პოპკულტურის მთელ კვირას, ტრადიციულად, ერთ სტატიად შეჯამებულს გთავაზობთ.

1. ოქროს გლობუსი 2024-ის გამარჯვებულები დასახელდნენ

ჩვენი დროით 8 იანვარს, რიგით 81-ე ოქროს გლობუსის დაჯილდოების ცერემონია ჩატარდა და ჰოლივუდის უცხოური პრესის ასოციაციამ გამარჯვებულები დაასახელა. როგორც ბევრი ვარაუდობდა, დრამის მიმართულებით საუკეთესო მხატვრული ფილმის კატეგორიაში Oppenheimer-მა გაიმარჯვა, კილიან მერფი კი კაცის როლის საუკეთესო შემსრულებლად დასახელდა.

გამარჯვებულების სრული სია ნახე აქ.

2. ცნობილი გახდა შინეიდ ო'კონორის გარდაცვალების მიზეზი

2023 წლის 26 ივლისს ცნობილი ირლანდიელი მომღერალი შინეიდ ო'კონორი 56 წლის ასაკში გარდაიცვალა. ახლახან ცნობილი გახდა ექსპერტიზის დასკვნა, რომლის მიხედვითაც, მომღერალი ბუნებრივი სიკვდილით გარდაიცვალა და სხვა საეჭვო გარემოებები არ დაფიქსირებულა.

უფრო ვრცლად წაიკითხე აქ.

3. რიზ უიზერსპუნმა დაადასტურა, რომ Big Little Lies-ის მე-3 სეზონზე მუშაობენ

ოქროს გლობუსი 2024-ის დაჯილდოების ცერემონიას სხვა ვარსკვლავებთან ერთად მსახიობი რიზ უიზერსპუნიც ესწრებოდა. უიზერსპუნმა ღონისძიებაზე დამსწრე ჟურნალისტებს დაადასტურა, რომ Big Little Lies-ის მე-3 სეზონზე უკვე აქტიურად მუშაობს და ჩვენი საყვარელი სერიალი ნამდვილად დაგვიბრუნდება.

უფრო ვრცლად წაიკითხე აქ.

4. GOT-ის შემქმნელების ახალი საი-ფაი სერიალის ტრეილერი გამოვიდა

3 Body Problem ("სამი სხეულის ამოცანა") ნეტფლიქსის ახალი საი-ფაი დრამა და ამავე სახელწოდების მქონე ჩინური ბესტსელერი წიგნის ეკრანიზაციაა. სერიალი HBO-ის სამეფო კარის თამაშების შემქმნელებმა, დევიდ ბენიოფმა და დ.ბ. ვაისმა გადაიღეს. ამასთან, ის ნეტფლიქსის ყველაზე ძვირადღირებულ პროექტადაცაა შეფასებული.

ნახე სერიალის ტრეილერი აქ.

5. ევროკომისიამ არჩევნებისთვის ახალგაზრდების მობილიზებაში ტეილორ სვიფტს სთხოვა დახმარება

ევროპარლამენტის არჩევნები 2024 წლის 6-9 ივნისს ჩატარდება და ევროკომისიის ვიცე-პრეზიდენტ მარგარიტის შინასის თქმით, ახალგაზრდების აქტიურობა ძალიან მნიშვნელოვანია. შინასის აზრით, ახალგაზრდების მოტივირება მათ თანატოლებს შეუძლიათ, რის მაგალითადაც პოპვარსკვლავი ტეილორ სვიფტი მოიყვანა.

უფრო ვრცლად წაიკითხე აქ.

6. ცნობილი გახდა, რომ ახალ ბიოგრაფიულ ფილმში მაიკლ ჯექსონის როლს მისი ძმისშვილი შეასრულებს

მალე მაყურებელი მაიკლ ჯექსონის შესახებ ახალ ბიოგრაფიულ ფილმს, სახელად Michael-ს, იხილავს. ფილმში ჯექსონის როლს მომღერლის ძმისშვილი, ჯაფარ ჯექსონი, ითამაშებს. ფილმზე მუშაობის პროცესში მაიკლ ჯექსონის ოჯახიც ჩართულია, გადაღებები კი 22 იანვარს დაიწყება.

უფრო ვრცლად წაიკითხე აქ.

7. არიანა გრანდემ ახალი სინგლი Yes, And? გამოუშვა

არიანა გრანდე რამდენიმეწლიანი პაუზის შემდეგ დაბრუნდა. მომღერალმა ბოლო ალბომი 2020 წელს გამოუშვა, ახლა კი სიმღერით Yes, And? გულშემატკივრებს ახალი მუსიკალური ერის დაწყება ამცნო.

მოისმინე სიმღერა აქ.

8. ემი ვაინჰაუსზე გადაღებული ფილმის პირველი ტრეილერი გამოვიდა

სულ მალე ცნობილ ინგლისელ მომღერალზე, ემი ვაინჰაუსზე, გადაღებულ ბიოგრაფიულ ფილმს ვიხილავთ. ფილმის სახელწოდება ვაინჰაუსის ერთ-ერთი ჰიტიდანაა აღებული — Back to Black ("წყვდიადში დაბრუნება"). კინოსურათში მთავარ როლს მარისა აბელა ასრულებს, რეჟისორი კი სემ ტეილორ-ჯონსონი გახლავთ.

ნახე ფილმის ტრეილერი აქ.

9. Bedford Falls-ის წამყვანმა ვოკალისტმა სადებიუტო სოლო ალბომის გამოშვება დააანონსა

პოპულარული ქართული ინდი-როკ ჯგუფის, Bedford Falls-ის, წამყვანი ვოკალისტი დათო ჯიქია მსმენელს მალე სადებიუტო სოლო ალბომს შესთავაზებს. FULLMETAL GEORGIA — ასე ჰქვია ალბომს, რომელსაც 27 წლის მუსიკოსი QAJITODIA-ის სახელით გამოუშვებს.

უფრო ვრცლად წაიკითხე აქ.

10. ევროვიზია 2024-ზე საქართველოს წარმომადგენლად ნუცა ბუზალაძე დასახელდა

წლევანდელ ევროფესტივალზე საქართველოს წარმომადგენელი საზოგადოებრივმა მაუწყებელმა პირდაპირი გზით, შიდაშესარჩევი კონკურსის გარეშე დაასახელა. ჯერჯერობით უცნობია, რა სიმღერას შეასრულებს 26 წლის მუსიკოსი შვედეთში დაგეგმილ კონკურსზე.

უფრო ვრცლად წაიკითხე აქ.