ნეტფლიქსზე სულ მალე ახალ საი-ფაი დრამას ვიხილავთ. 3 Body Problem ("სამი სხეულის ამოცანა") — ასე ჰქვია სერიალს, რომლის პრემიერაც სტრიმინგ პლატფორმაზე მარტში შედგება.

სამი სხეულის ამოცანა ჩინელი მწერლის, ლიუ ცისინის, ამავე სახელწოდების რომანს ეფუძნება. სიუჟეტი 1960-იან წლებში იწყება და ასტროფიზიკოს იე ვენჯიეს გარშემო ვითარდება. ვენჯიეს, რომელიც ჩინეთის კულტურული რევოლუციის დროს მამის სასტიკ მკვლელობას შეესწრო, სამხედრო სამსახურში იწვევენ და ქვეყნის შორეულ მხარეში, საიდუმლო სადაზვერვო ბაზაზე გზავნიან. სხვადასხვა დროში და კონტინენტზე განვითარებული მოვლენები 8-ეპიზოდიან სეზონშია გაერთიანებული.

"სამი სხეულის ამოცანა ეპიკური ამბავია, რომელიც თავისი მრავალშრიანი იდუმალებითა და ადამიანური კავშირების ამბით საი-ფაი დრამას გარდაქმნის", — წერს ნეტფლიქსი სერიალის აღწერაში.

აღსანიშნავია, რომ სამი სხეულის ამოცანა HBO-ის სამეფო კარის თამაშების შემქმნელებმა, დევიდ ბენიოფმა და დ.ბ. ვაისმა გადაიღეს. როგორც ცნობილია, თითოეული ეპიზოდის გადაღება დაახლოებით $25 მილიონი დაჯდა, რაც სერიალს ნეტფლიქსის ყველაზე ძვირადღირებულ პროექტად აქცევს. $200-მილიონიანი ბიუჯეტით, სამი სხეულის ამოცანა სერიალების ისტორიაში მეორე ყველაზე ძვირადღირებული პროექტიცაა (Amazon-ის ბეჭდების მბრძანებელი: ძალაუფლების ბეჭდების შემდეგ).

///

პროფესიით კომპიუტერულმა ინჟინერმა, ლიუ ცისინმა, სამი სხეულის ამოცანა ჯერ კიდევ 2008 წელს გამოსცა. მანამდე ნაწარმოები ერთ-ერთ ჟურნალში ქვეყნდებოდა ნაწილ-ნაწილ. რომანმა სათავე დაუდო დედამიწის წარსულის ტრილოგიას, რომელიც ერთ-ერთ ყველაზე პოპულარულ საი-ფაი წიგნების სერიად იქცა.

სამი სხეულის ამოცანის ინგლისურენოვანი თარგმანი 2014 წელს გამოიცა და ცისინის წიგნი პირველი აზიური რომანი გახდა, რომელმაც ფანტასტიკის ჟანრის ერთ-ერთი ყველაზე პრესტიჟული ჯილდო, ჰიუგოს პრემია, დაიმსახურა. ნაწარმოებს რეკომენდაცია გაუწიეს ფეისბუქის შემქმნელმა მარკ ცუკერბერგმა, სამეფო კარის თამაშების ავტორმა ჯორჯ რ.რ. მარტინმა და აშშ-ის ყოფილმა პრეზიდენტმა ბარაკ ობამამაც. ცისინის ტრილოგიამ დასავლეთში კომერციულ წარმატებასაც მიაღწია — წიგნები მსოფლიოში ცხრა მილიონზე მეტ ეგზემპლარად გაიყიდა.

სამი სხეულის ამოცანის პრემიერა ნეტფლიქსზე 21 მარტს შედგება.

ასევე იხილეთ:

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…