მოკლედ: კულტურული მემკვიდრეობის დამცავ ზონებში უნებართვო ან სანებართვო პირობების დარღვევით ნაწარმოებ მშენებლობებზე სანქციები მკაცრდება.

  • ამის შესახებ კახა კალაძემ თბილისის მთავრობის სხდომაზე განაცხადა.

დეტალები: კალაძის თქმით, ახალი კანონის მიზანია "კულტურული მემკვიდრეობის დამცავ ზონებში უკანონო მშენებლობების მაქსიმალურად აღკვეთა, ხელის შეშლა და მისი სახით, ერთგვარი პრევენციული მექანიზმის შემოღება".

  • კანონი 2024 წლის 11 იანვრიდან ამოქმედდება.

რას გულისხმობს ახალი კანონი:

  • კულტურული მემკვიდრეობის დამცავ ზონაში უნებართვო მშენებლობა სახელმწიფო ან მუნიციპალიტეტის საკუთრებაში არსებულ უძრავ ქონებაზე, დაჯარიმდება 250 000 ლარით (ნაცვლად 25 000 ლარისა);
  • კულტურული მემკვიდრეობის დამცავ ზონაში უნებართვო მშენებლობა კერძო საკუთრებაში არსებულ უძრავ ქონებაზე, III ან IV კლასის შენობა-ნაგებობის მშენებლობისთვის ან III ან IV კლასის შენობა-ნაგებობაზე განხორციელებული მშენებლობისთვის, დაჯარიმდება 200 000 ლარით (ნაცვლად 20 000 ლარისა);
  • ჯარიმები გამკაცრდა ასევე, I და II კლასის შენობა-ნაგებობების უნებართვო მშენებლობებისთვის;
  • კულტურული მემკვიდრეობის დამცავ ზონაში სანებართვო პირობების დარღვევით ნაწარმოები შენობა-ნაგებობის მშენებლობისთვის: III კლასის შემთხვევაში, ჯარიმა იქნება 30 000 ლარი (ნაცვლად 10 000 ლარისა); ხოლო IV კლასის შემთხვევაში, ჯარიმა იქნება 75 000 ლარი (ნაცვლად 15 000 ლარისა);
  • კულტურული მემკვიდრეობის დამცავ ზონებში მშენებარე ობიექტების კონსერვაციის წესის დარღვევით მიტოვებისთვის, III და IV კლასის შემთხვევაში, ჯარიმა იქნება 150 000 ლარი (ნაცვლად 20 000 ლარისა);

ასევე, ჯარიმები გამკაცრებულია კულტურული მემკვიდრეობის დამცავ ზონებში არსებული უძრავი ძეგლებზე განხორციელებული უკანონო მშენებლობისთვის.

  • სარეაბილიტაციო სამუშაოების განხორციელება ძეგლზე: უნებართვოდ — დაჯარიმდება 250 000 ლარით; სანებართვო პირობების დარღვევით, დაჯარიმდება — 150 000 ლარით; კონსერვაციის წესების დარღვევით, დაჯარიმდება — 200 000 ლარით;
  • მცირე სარეაბილიტაციო სამუშაოების განხორციელება ძეგლზე კი: უნებართვოდ,
    დაჯარიმდება — 40 000 ლარით; სანებართვო პირობების დარღვევით, დაჯარიმდება — 20 000 ლარით; კონსერვაციის წესების დარღვევით, დაჯარიმდება — 25 000 ლარით.